Nieu Aemstelredams Liedboek

Op de wijse, Allemange de Cornel.

IN smert en pijn // leef ick op dit termijn
Om dat ic moet zijn // al van de liefste mijn
Mocht ick by haer wesen
Aensien haer, aenschijn claer,
So soude zijn genesen, Mijn out lijden swaer
Ick moet van haer scheyden,
Nochtans den tijdt verbeyden,
Dat ick eens subijt, Schoon lief sonder verwijt
Sal comen daer ghy zijt.

Fris Roosemareyn // Anders niemant certeyn

Hoept op eeren reyn
Door aenstoot liefste greyn,
Mijn hart vol van rouwen,
Valt gants geheel ter neer, om die schoonste vrouwe,
Daerom mijn hart seer,
Schoon lief laet my verwerven
Och ick sal moeten sterven,
Vwen rooder mont, so wort mijn hart gesont
Twelck eylacy is deurwont.

O bloemken delicaet, Troost my eert wort te laet,

Want crijch ick gheenen raedt,
Ick worde gheheel desperaet
Van mijn liefste schoon
Die ick seer bemin, Want sy spant de croon
Alleen in mijnen sin, Door haren troon
Geeft uwen dienaer loon, So sal zijn gedaen
Mijn druck en swaer vermaen,
T'welck my cost menighen traen.