Nieu Aemstelredams Liedboek

Op de wijse: Noch heb ick een oudt Wijf, etc.

EY laet ons nu doch vrolijck zijn
Vrolijck sonder treuren
Drinckt // en schinckt // den coelen wijn
T'mach ons niet altijt beuren
Diet begeeren // die hebben t'goet,
Diet verteeren // hebben den moet
Ick gis dat hy so wel vaert, diet verdoet
Als diet bespaert // het ghelt gheen giericheyt en boet.

Laet nu alle sorghe vaert

Van ons zijn verdreven,
Want een lustich // rustich hardt
Doet den mensch lang leven
Diet begheeren // die hebben t'got, etc.

Set het croesgen aen v mont

En willet schoon wtdrincken,
De wijn verheucht ons hartsen gront
Ghy sult gheen droefheyt dincken
Diet begheeren // die hebben t'goet, etc.

De tijt die eyscht nu vrolijcheyt

In ons jonghe jaren, de sorch is d'ouden opgeleyt
Dus laet ick sorghe varen
Diet begheren // die hebben t'goet, etc.

Princen al wort ons vreucht benijt

En wilt daerom niet schromen,
Het sorghen leert hem metter tijt:
Het sal vroech ghenoech comen,
Diet begheeren // die hebben t'goet, etc.