Nieu Aemstelredams Liedboek

Op de wijse. Ick maeck gheclach met reden op deser tijt.

Vryer.

CVpido wreet, Hoe valt ghy my rebel,
In liefden heet, Doet ghy my groot gequel
Die ick heb vercooren
Sy sou niet willen hooren,
Nae my dat weet ick wel.

Vrijster.

Hoe comt dat by // isse v te hooch van staet

Verclaert het my, ick sal v gheven raet,
Wilt v liefde hart vertellen
V selven dus niet quellen
Ghy sult wel vinden baet.

Vryer.

Wist ic certeyn, Dat sy my wou verstaen

Haer wou ic alleyn, Mijn liefde van stonden aen,
Wt jonstigher begheeren
Mijn liefde presenteren,
Met lieflijck vermaen.

Vrijster.

Segt haer vry, Ten mach haer schaden niet,

T'was jammer dat ghy
Om haer quaemt in't verdriet,
Dus v doch wel versinnet
Wie ist die ghy beminnet
Swijcht het teghens my niet.

Vryer.

[fol. 57]

 

Om dat ghy't begheert

 

Dat ick het v verclaer, ghy zijt expeert

 

Mijn hulp mijn troost voorwaer,

 

Meucht ghy my niet ghebeuren

 

Die doot sal ick besueren

 

Dat seg ick v seer claer.

 

Vrijster.

 

Noyt meerder dangier

 

En quam in't harte mijn, Dan ick nu hier

 

Van v op dit termijn,

 

Dus houdt v doch verqueten

 

Ick salt oock niet vergheten

 

Dat ick bespot moet zijn.

 

Vryer.

 

O suyver Kerssou

 

Ghy hebt mijn hart deurwont:

 

Ick spot niet met, Nu noch t'eeniger stont

 

Mach ick v niet verwerven

 

Van rouwe moet ick sterven

 

Dat seg ick v goet ront.

 

Vrijster.

 

O Jongeling goet

 

V claghen doch cesseert, V liefde doet

 

Dat mijn hart tot v keert

 

Dus wilt my toe betrouwen,

 

Ick ben tot v ghehouwen

 

Te doen dat ghy begheert.

 

Vryer.

 

Princesse reyn, Ick danc v met ootmoet,

 

Ghy zijt certeyn, Die my in liefden voedt:

 

Ick sal van v niet wijcken,

 

Maer altijdts laten blijcken

 

Ghetrou tot in der doot.

 

Vrijster.

 

Prince eerbaer, Ick ben altoos bereyt,

 

Soo voor als naer

 

Te vrijen v eerbaerheyt,

 

En doen al v begheeren,

 

Behouden mijner eeren:

 

Dus weest van druck ontseyt.