Nieu Aemstelredams Liedboek
(1591)–Anoniem Nieu Aemstelredams Liedboek–
Auteursrechtvrij
[Folio 58]
| |
Sottinnen mal // maeckt bly gheschal
Al die de cap beminnen:
Wie nae die caert // hier openbaert
De sotste aerdt, Sal daer de cap me winnen.
V soete geest // laet mercken meest,
Gaet alle droefheyt staken,
Eert Bacchus feest // drinckt als een beest,
Om aen de cap te raken,
Drinckt heel en half // Het is goe salf,
Al vilt ghy't Kalf // Het spoelt lustich v kaken.
Hoereerders mee // maeckt v gheree
Of t'spel en sou niet focken,
Baert hier ter stee, V sotte zee
Al soumen met v jocken,
Met Hoeren blust // v sotte lust, ja niet en rust
Voor dat ghy hebt de pocken.
Comt hoovaerdy // hier oock al by,
En laet de gheck wt kijcken,
V sotterny, Laet mercken vry
Lustich in alle wijcken,
Hoochmoedich gaet // al by der straet
Vroech ende laet,
De cap sult ghy wel strijcken
Gierighen Sot, speelt den marot
Ghebruyckt subtijle listen,
Schraept in v pot, het groote lot,
En wilt het niet verquisten,
Ghelt, goet aencleeft // en sober leeft,
Niemant wat geeft, maer vult sacken en kisten.
Ghy Princen fier // die ick nu hier
Niet noemen can by namen,
By Deglentier // toont het bestier
Van sotheyt altesamen,
Laet in de May // groeyen de kay
En danst het ay // Om die cap sonder schamen.
|
|