Nieu Aemstelredams Liedboek

Op de wijse: Voys qui Passa.

COmt altesamen, wilt v niet schamen
Om na t'betamen, die mey t'ontfaen
Vry sonder blamen, Wilt haer om vamen
Want sy by namen, is ontdaen
Sy staet nu int groen, In dit saysoen
Haer eer aendoen // in dit plaen.

Door haer virtuyten, die cruyden spruyten

Die voghels fluyten al na haer aert
Comt nu vry buyten v liefde uyten
Blijft niet in muyten, weest onvervaert
Acht niet den praet, van nijders quaet
Maer haer versmaet en varen laet
Tot uwer baet, En met v liefken praet.

Melancolie, Set aen d'een zye

Met moede blije, ghenuecht hanteert
Laet nu ten tije, goe sermonije
Sonder onvrye, Sijn gheuseert
De Mey nu plant met goet verstant
Die triumphant, ons hier int lant
Seer abondant, met zijnder deucht vereert.

Princes eerbaer, dees May eenpaer

In tsoetste vant Jaer datter sal comen
Neemt hem nu waer, en weest danckbaer
V liefken claer, cust sonder schromen
En neemt in danck, sonder bedwanck
Het licht gesanck, van ons die cranck
In conste ranck, zijn Mostaert bloemen.