Nieu Aemstelredams Liedboek

Op de wijse: Alst begint.

AL waer ick half doot,
Jae met fenijn vergheven,
Door v schoon Lief minioot,
Sou ick vercrijghen t'leven,
En sonder v mijn Lief verheven,
Al waer mijn hart also gesont, in corter stont,
Soud' met den strael des doots werden ghewont

Want mijn hart, ziel en lijf

Rust Lief op v ghenade,

[fol. 42]

 

V knecht ick eeuwich blijf, al vielt tot mijner schade

 

V goetheyt wijs van rade,

 

Voorcomen sal alsulck verdriet

 

Dat hoep' ick siet

 

Door trou en deucht die my van v gheschiet.

 

Menighen tijt certeyn,

 

Gae ick my occuperen // Om liefd' met liefde reyn

 

Wel te recompenseren,

 

Tot dankbaerheyt streckt mijn begheren,

 

Ick sal't bewijsen met der daet // lief delicaet

 

Soo lang die asem wt mijnen monde gaet.

 

Al des Weerelts jolijt

 

Staet my als droefheyt teghen

 

Daer ghy lief niet en zijt // In wient al is gelegen

 

Can ick gheen vreuchde pleghen,

 

Gheen dinck en valt my alsoo swaer

 

Schoon Lief eerbaer

 

Als v absenti: t'eenigher tijdt dats claer.

 

Deuchtsame schoone Vrou,

 

Princes waert om beminnen

 

Blijft v dienaer ghetrou // Verandert niet van sinnen

 

Laet v van gheen opreers verwinnen,

 

Mijn liefde sal tot geener tijt, ende wiet benijt

 

Vergaen: voor dat de doot mijn hart doorsnijt.