Nieu Aemstelredams Liedboek

Op de wijse: Helaes ick lijde groote pijn.

AEnsiet uwes dienaers staet
Schoon bloemken wtghelesen,
Peynst doch eens hoet met hem gaet
Die van v absent moet wesen,
Helaes wat isser grooter pijn
Dan van zijn Lief absent te zijn.

Niemant dan ghy ter Weerelt wijt

Mach ghenesen mijn smerte,
Want ghy Lief alleene zijt
Wtvercoren in mijn harte, helaes, etc.

Neemt doch dit exempel fray

Van het Tortelduyfken reyne,
Alst verlooren heeft zijn gay,
Soo vlieghet altijdt alleyn, helaes etc.

Alsoo isset oock met my

Gheen vreucht can my verblijden,
Mijn jonck hart vol fantasy
Maer t'verheucht hem in zijn lijden, helaes, etc.

En nochtans dees pijne groot

[fol. 43]

 

Sou ick reyn patientich draghen,

 

Als ick wist mondeken root,

 

Dat mijn dienst v mocht behagen, helaes, etc.

 

Biedt mijn schoon Lief v handt,

 

Helpt my doch wtcervoren,

 

Eer dat my den minnen brandt

 

In dit lijden doet versmooren,

 

Dan sal ick van dese pijn

 

Eens te recht ghenesen zijn.