Nieu Aemstelredams Liedboek

Op die wyse, Een Liet eerbaer:

DIe Mey playsant, Is lustich int useren
Seer triumphant
Gaet met v lief spanceren
Int groene lant, met bomen schoon geplant
Daer Venus sal regeren
Cupidoos hant, sal vreucht aldaer vermeren

Twist ende haet, Is van die liefd verdreuen,

Des nyders praet, Wort geen gehoor gegeuen
Dies comt al uyt // dier sitten inder muyt
Met Amoureus verlanghen
Met soet gheluyt // wilt dese Mey ontfangen

Den frayen sanck, der vogelen wilt aenhoren

T'lustich geclanck, wilt vreuchdelick na sporen
Vroech ende laet // met lief spanceren gaet
Onder die groene bomen
Doet Venus raet, t'sal zijn tot uwer vromen

Die bloemkens fier, Nu wter aerden spruyten

Door het soet bestier, Al van des meys virtuten
Met goeder vreucht // V jonge hart verheucht,
In dese Maye tijden, V jonghe Jeucht,
Sal v van sorch bevryden.

Prins excellent, Verheucht v sin blymoedich

Der vreuchden tent, sal Venus zijn behoedich
Orpheus woort // zynder snaren accoort
Wilt v met sang vermengen
Musae compt voort, En helpt de Mey volbrengen