Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
Auteursrechtvrij
[Folio 109r]
| |
Op de wijse. Te mey als al die voghelen singhen. Oft op. Hoort al te samen bidt ende waeckt. etcetera.GOd heeft ons zijn Euangelium gegeuen,
Om dat wy vromelijck souden leuen,
Maer die werelt acht dit cleyne:
Den meesten deel die boosheyt aencleuen,
Dit bediet den laetsten dach, gemeyne.
Men vraecht niet nae die reyne leer,
Maer ghelt door woecker soeckt men meer,
Onrecht sweeft nu heel crachtich:
Die liefde vergaet, hoe langher, hoe seer,
Dit bediet den laetsten dach, waerachtich.
Die weereldt die breyt haer listich net,
Met schoonen schijn, in haren Wet,
Waermet sy gheeren saghe:
Dat alle menschen werden besmet,
Met haer in desen laetsten daghe.
Dat Euangelium heeft grooten rom,
Nochtans so volghen sy meest dat crom,
Twelck is een spot, voor Godt, seer groot:
Noch spreect den boosen, wat gheuick daerom,
Den laetsten dach heeft noch gheen noot.
Die wereldt veel boeuerije bedrijft,
Boosheyt, on onghelooue verstijft,
Recht of daer gheen Godt en waere.
Dat rechte Ghelooue int lijden blijft,
Dit is des laetsten dachs, en maere.
Den Kercken ontreckt men renten, en goet,
| |
[Folio 109v]
| |
Maer cleyn ghewin, elck daer met doet,
Die armen nootdruft lijden:
Men neept hun tbroot, dat hun hier voet,
Twelck ons bediet die laetste tijden.
Sy en hebben den Kercken gegeuen niet,
Noch oock ghesticht alsoomen siet,
Nochtans nemen sy dat goet met cracht:
Den gierigen Mammon, dit werck eerst riet,
Dit bediet den laetsten dach, verwacht.
Men vraecht na God den Heere niet meer,
Een yeghelijck soeckt zijn bate en eer,
Hoouaerdicheyt neempt die ouerhant.
Lieghen, bedrieghen, hanteertmen seer,
Hier door is den laetsten dach bekant.
Waer is des naestens liefde ghebleuen,
Die wereldt is tot onrecht ghegheuen,
Tghetrouwe Ghelooue is veriaecht:
Tot rapen en schrapen, staet al dit leuen,
Dit bediet den ioncxsten dach, gewaecht.
Die werelt wil haer niet laeten leeren,
Tot Godt en sietmen tvolck niet keeren:
Elck wil zijn Ouders volghen verblent:
Die brassen en buysen, dat syn haer Heeren,
Dit bediet den laetsten dach present.
Des weerelts hoeueeren, en bancketeeren,
Bedrijft hoereren, in haer studeren,
Hier toe heeft sy oock meesters veel:
Den duyuel die cant al recht gloseren:
Den laetsten dach brengt dit ghequeel.
| |
[Folio 110r]
| |
Die Sonne can dit niet langher lijden,
Haer claerheyt ontreckt sy den boosen tijden,
Der sonden nacht, bedeckt haer schijn:
Die weerelt vergaet, en haer verblijden,
Des Heeren dach, sal nu haest zijn.
Die Maene en Sterren lijden verdriet,
Twelck men aen haerlicx wesen siet,
En waren des iammers gheeren vry:
Den Heere en lijt dit langher niet,
Den ioncksten dach, is ons seer by.
O Jhesu Christe wilt tot ons snellen,
En helpt u Christenen wt dit quellen,
Op dat haer lijden eynden mach,
Des Pausdoms horen wilt neder vellen,
En laet ons sien den laetsten dach.
|
|