Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp den naeuolghenden thoon. Waeckt op ghy Christenen alle,
Sijt nuchteren al ghelijck:
Roept Godt aen, met gheschalle,
Den Vader in Hemelrijck.
| |
[Folio 107r]
| |
 Of hy salt scherpelijck wreken,
En ons velaten bloot,
Blijuen wy in sonden noch steken,
In nijt, en ander ghebreken,
Wee ons der straffen groot.
Sijn woort Godt rijckelijck sendet,
Vol ghenaden openbaer:
Noch blijuen wy verblendet,
En sondighen oock eenpaer:
Dat straffen en mach niet baten,
Godt moet zijn slaende schier,
Sijn dienaren sietmen haten,
Ent Goddelijck woort verlaten,
Wat wilt noch werden hier.
| |
[Folio 107v]
| |
Men siet hier nu int claere,
Wat sonde hier gheschiet:
In Steden, en Dorpen te gaere,
Men wil die waerheyt niet:
Wat souden ons die gheleerden?
(Die boosen segghende zijn)
Leeren? sy zijn die verkeerden:
Ons Vaders gheen dwaesheyt vermeerden,
Als sy dienden die Papen fijn.
Die sonde haet Godt seere,
Van deses werelts beghin:
En straft die tallen keere,
Hy en doet oock nu niet min:
Ist dat wy der sonden niet steruen,
So men in Nineue sach,
Die straffe sal ons aeneruen,
Godts plaeghen die sullen verderuen,
Die Steden, so Sodoma lach.
Godt liet den Jooden mercken,
Sijn straf, om haer sondighe daet:
Door Moysen, en wonderwercken,
Vercondicht hy synen raet:
Joannes met alle Propheten,
Bewesen hun Christum recht,
Maer sy en wouden niet weten,
Godts Woort noch zijn Secreeten,
Siet, waer is nu haer gheslecht?
Den Torck die is voorhanden,
Een bloethont en is niet wijt,
| |
[Folio 108r]
| |
Pestilenci in alle landen,
Met dieren tijt, verslijt.
Wie sal dit al afkeeren?
(O Vader ghenadich en groot)
Ist dat wy dijn woort niet leeren,
En dijnen lof vermeeren,
Wy steruen in grooten noot.
En wilt u niet verblenden,
Maer betert u leuen en val:
Dat Godt zijn straffe wil wenden,
Die wy verdienen al.
Den Torck dat is zijn roede,
Met andere plaghen straf,
Om dat wy deewighe goede,
Van Godt verlaeten onuroede,
En van sonden niet wijcken af.
Daeromme wil ick elck raden,
Laet u Afgodisch werck:
En ander sondighe daden,
Daer ghy in steeckt seer sterck,
Vernieut u gantsch van leuen,
Op dat ghy Godt behaecht,
Wilt vierich Godts woort aencleuen,
Menschen leeringhen ons vergheuen,
So Godes Kercke beclaecht.
Godt sal ons voorspoet senden,
Als wy hem hier dienen alleyn,
En oock zijn Rijcke toewenden,
Met alle vercoren reyn.
| |
[Folio 108v]
| |
Daeromme so laet ons bouwen,
Op Godts ghenade bereyt,
Met een stantuastich betrouwen,
Hem dienende sonder verflouwen,
Aflegghende tsondich cleyt.
Hy schenckt ons hier beneden,
Sijnen Sone wtghestreckt:
Die heeft voor ons ghebeden,
Ende ghewasschen ons wonden beuleckt:
Hy heeft ghenaede verworuen,
Door zijnen bitteren doot,
En is voor ons ghestoruen,
Die sonder hem waren verdoruen,
Ende helpt ons wt allen noot.
Wilt ghy niet eewich lijden,
So compt tot Christum al:
Sijn ghenade is ons verblijden,
Ons wercken zijn licht en smal:
Wilt van den Antechrist wijcken,
Nu, nu, neempt gheen respijt,
Eert Godts woort sonder beswijcken,
Schout Ketters, en Heretijcken,
Op dat ghy by Godt verblijt. Amen.
|
|