Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp den naeuolghenden thoon. Hoort toe ghy Christenen subijt,
Hoe Lijf en Siele tsamen strijt,
Alleen op deser Eerden:
| |
[Folio 103v]
| |
 Desen camp gheduert altijt:
Den Gheest moet tvleesch aenueerden.
Dat Vleesch dat spreeckt, ick ben gesont,
En hebbe noch menighen goeden stont,
Eer my die doot doet beuen:
Daerom wil ick van herten gront,
In allen wellust leuen.
Die Siele seyt, dit radick niet,
Maer vreest Gods strenghe oordeel siet,
In den Doop zijt ghy verbonden:
Te laeten al wat u Godt verbiet
En zijn woort te vermonden.
Dat Vleesch spreect, ick ben stout en fijn,
Met goede Ghesellen, by coelen Wijn,
Daer wil ick zijn met vruechden,
Singhen, springhen, op dit termijn,
Tis noch te vroech tot duechden.
Die Siele spreect, denck op den rijcken man,
Die hem nam tijdelijck lusten an:
Lijf en Siele moesten strijcken,
Int helsch verdriet, en duyuels ban,
Soo Christus claer doet blijcken.
Dat vleesch spreect, wat acht ic tgeclach,
| |
[Folio 104r]
| |
Ick hebbe voor my noch menighen dach,
Daerin ick mach bekeeren:
Mijn sonden beweenen, en segghen ach,
Als mijn droefheyt sal meeren.
Die Siele spreeckt, ghy hebt geen gewelt,
Jonck en out wort haest versnelt,
Ghy en hebt gheenen morghen:
In een ooghenblick zijt ghy neder gheuelt,
Ten sy dat Godt wil borghen.
Dat Vleesch spreect, het sy vroech of laet,
Ick wil hier volghen sweerelts staet,
Die soeckt al haer wellusten:
Daerin wil ick leeren haren raet,
En leuen vry met rusten.
Die Siele spreeckt, nu compt den tijt,
Dat Lijf en Siele scheyden subijt,
Wat macht u dan al baten?
Denckt dat ghy in asschen verkeerende zijt,
Ghy moet die werelt laten.
Dat Vleesch dat spreect, ghi maect my bang,
Nae deewighe vruecht ick nu verlang,
O Christe wilt my helpen:
Dat ick tot den Vader hebbe ingang,
Op dat mijn trueren mach stelpen.
Die Siele spreeckt, ten is gheen spot,
Een ghebroken herte vordert Godt,
Dat vleesch moet hier versteruen:
Want tis gheuallen int tijdelijck lot,
En in der wormen verderuen.
| |
[Folio 104v]
| |
Dat Vleesch dat spreect, o God mijn Heer,
Helpt dat ick my door Christum bekeer,
En mijn Ghelooue verstercke:
Laet my hier lijden ter weerelt meer,
Op dat ick u vruecht aenmercke.
Die Siele spreeckt, nu heb ick recht,
Al ben ick toch een onnut knecht,
O Godt rechtuaerdich alleyne,
Beurijt my van des duyuels gheuecht,
Door Christi lijden reyne.
Also maeck ick mijns Liedekens ent,
En bidde dat Godt elcx herte omwent,
Tot Christum synen Soone,
En dat hy verlichte dat vleesch verblent,
Met synen woorde schoone. Amen.
|
|