Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp den naeuolghenden thoon. Ontwaeckt mijn hertken schoone,
Ghy Christelijcke schaer:
En luystert nae mijnen thoone,
In Godes woordt seer claer:
| |
[Folio 102r]
| |
 Twelck nu soo lieuelijck klinghet,
En blinckt als den dach een paer,
Die door Godts wille doordringhet.
Der sienden Prophetye,
Hoort men nu wederom:
Verborghen menighen tye,
Wast Euangelium.
Twelck men nu soetelijck hooret,
Want sy spreken, die heeten stom,
Mijn herte des vruecht oorbooret.
Met veel menschen insetten,
Met bannen, ende ghebot:
Met Missen, en sielen Netten,
Wort den Paus nu een spot:
Een yeglijck die spreeckt hem schanden,
Als eenen valschen Afgodt,
In allen Christen Landen.
Christus veel boden seyndet,
Die hier verclaren syn woort:
Harer vele worden ghescheyndet,
| |
[Folio 102v]
| |
Gheuanghen ende vermoort.
Men wil die waerheyt decken,
O Christenen die Godt toehoort,
Laet u van haer niet trecken.
Wilt den huychelaer niet vertrouwen,
Al is hy cloeck ghesint:
Voor menschen leer hebt grouwen,
Hoe goet sy schijnt bemint.
Ghelooft Godts woort alleyne,
Waer door ons Godt inprint,
Sijnen goeden wille reyne.
Gheeft u int woort gheuanghen,
Wattet u beueelt, dat doet:
Hebt hier in gheen verlanghen,
Al zijn beuel is goet.
Wat dit beloeft, is vry,
Wie anders leert (schrijft Paulus soet)
Vermalendijt die sy.
Dit woort verandert smerten,
Van sonde, en helsche pijn:
Ghelooft ghy dit van herten,
So wort ghy der sonden fijn.
En vry, oock van der hellen,
Dese leere moet Christi zijn,
Wilt u hier al toe snellen.
Salich is dach en ure,
Daerin dat Godes leer:
Hier clinckt in die Schriftuere,
Der Sielen troost en eer,
| |
[Folio 103r]
| |
Niet lieuers en mach wesen,
Onder alle verheuen seer,
In hemel, en aerde ghepresen.
O Christen herte int leuen,
Blijft by Godts woort seer reyn:
In hem ist leuen verheuen
Der sielen dit is certeyn.
Die hem hier af laet leyden,
Door valsche Leeraers alleyn,
Moet hem tot droefheyt bereyden.
|
|