Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
Auteursrechtvrij
[Folio 92v]
| |
Op den naeuolghenden thoon. Weerelijck eere, en tijdtlijck goet,
Wellust en allen oueruloet,
Is als een Gras hier nu gheset,
Allen pracht, en de stouten roem,
Vergaet als een seer witte bloem,
O menschen hier op wel let,
En versorghet die Siele bet.
| |
[Folio 93r]
| |
Stelt u dijn eynde daghelijcx vuer,
Ghedenckt dat die doot is voor die duer,
En wil met u van hier voortgaen,
Hy clopt u aen, ghy moet van hier,
Ghy moet betalen schier,
Hebt ghy nu dan recht ghedaen,
So vindy goeden loon zaen.
Als die siele ter hellen sinckt,
En tvleesch vanden wormen is verslinckt,
So salt weder verrijsen:
En sal voor dijne Goddelijcke cracht,
Rekenschap gheuen met aendacht,
Ach tot wat groot afgrijsen,
Sult ghy die boose wijsen.
Daer sal een reyn herte en vat,
Veel meer ghelden dan allen schat,
En aller menschen goeden:
Die hem versoent met Godt seer groot,
En sal daer lijden gheenen noot,
Die Godts wille doet, met moeden,
Sal Godt daer oock behoeden.
Een goede conscientie reyn,
Is beter dan Edelsteyn,
En costelijcker dan Gout:
Die, die van Christo erlangt,
En hem ordentlijck aenhangt,
Den quijtet Godt vertrout,
Sijn sonden menichfout.
Gheen Rijckdom noch oock ghewelt,
| |
[Folio 93v]
| |
Gheen scierlijckheyt hoe schoon ghestelt,
Helpt yet ter salicheyt:
Ten sy dat herte oock ghelijck,
In Godes gauen hier sy rijck,
En versciert met gheestelijckheyt,
In Christi deelachticheyt.
Christus die spreeckt openbaer,
En seyt tot alle menschen claer:
Die met my leuen wil,
Die neme op syn cruyce schier,
En volghe my ghehoorsaem hier,
Doende opt tsweerelts hiel,
Niet Adams, maer mijnen wil stil.
O mensche Jeshum Christum aensiet,
Dewijl hy hem hier self aenbiet:
Wilt u onder hem gheuen,
Neempt op syn iock, licht en soet,
En volcht hem nae, met trouwen moet,
So sult ghy syn verheuen,
En met den Enghelen leuen.
Ghelooft den Heere van herten gront,
En belijt hem oock met den mont:
Prijst Godt hier met der daet,
In synen dienst u slecht gheneert,
En doet wat syn woordt recht begheert:
So sal hy u met syn ghenaedt,
Altijt bystaen sonder verlaet.
Regeert u nae syn leere,
Gheeft hem lof, prijs, en eere:
| |
[Folio 94r]
| |
Met onderdanicheyt,
Spreeckt met herten ghehuldich,
O, Godt, een en Drijuuldich,
Dy sy lof, en heerlijckheyt,
Hier, en daer, in eewicheyt.
|
|