Een hantboecxken inhoudende den heelen Psalter des H. propheete Dauid

Een liedt, waer in men biddet om een salighe ure des doots.

[fol. 75v]

Op de wijse. Ich sunfftz und klag, uil langer tag. Oft op. O Jesu zart, Göttlicher art.

HElpt my o Heer, ick bidde seer,
Wilt toch van my niet wijcken:
Als om steruen, met haer conseruen,
Die doot tot my compt strijcken:
So stercket my, dat ick toch dy,
Bekenne mijnen Heere,
Door dijne reyne leere:
Met my dan strijt, als compt dien tijt,
Dat in den noot, die bitter doot,
Met my wil nijdelijck wringhen,
Dat lijden swaer, benaut my gaer,
Laet my dit niet mislinghen.

Nae dien ghy zijt, Jhesu altijt,

Den wech, waerheyt en leuen:
Help my dat ick, mach sekerlick,
Dy ganschelick ouergheuen:
Dat ick met spoet, desen wech goet,
Bereyt mach syn te wandelen,
En altijt duecht te handelen.
Tvleesch is rebel, al wil ick wel,
Ten wilder niet an, hem beeft daer van,
Met traecheyt ist beladen.
Tot uwen lof, ist plomp en grof,
O Heere keert my van schaden.

O heylighe Gheest, compt aldermeest,

Als siele en lijf moet scheyden:
Als die doot bijt, en zijt niet wijt,

[fol. 76r]

 

Wilt my recht wel bereyden:

 

So werdick ghesont, ter seluer stont,

 

Om int ghelooue te varen,

 

By u Engelsche scharen:

 

Dat lieue Heer, ick wel begheer,

 

Staet my by ghy, dat ick mach vry,

 

Van dy ontfanghen werden.

 

Vader bemint, ick ben u kint,

 

Neempt my van deser eerden. Amen.