Een hantboecxken inhoudende den heelen Psalter des H. propheete Dauid

Een liedt in tijt der droefheyt ende aenuechtinghe der sonden.

Op de wijse. Een amoreus fiere ghelaet. Oft op. Ick hoorde een Maechdeken singhen. Oft op. Rijck Godt wie sal ickt claghen.

O Godt ick moet u claghen,
Met eenen droeuen moet:
Mijner vyanden die my plaghen,
Is die meeste mijn vleesch en bloet.
Heere ick suchte seere,
In daghelijckschen strijt,
Desen vyant ben ick te teere,
Want hy verwint altijt.

Int schelden en int vloecken,

Daer is tvleesch in gherust:
Ten wil gheen duechden soecken,
Maer volghen synen lust:
Twil altijt wederstreuen,
Teghen u Heere mijn Godt,
Ten wil hem niet begheuen,
Onder des wets ghebodt.

Dat claeg ick van gantscher herten,

Dijn Goddelijcke Mayesteyt,

[fol. 74v]

 

Int cruyce van lijden en smerten,

 

Wil tvleesch niet volghen bereyt.

 

Ick en cant niet bedwinghen,

 

Sonder u ghenadich ghedult,

 

Het can my daghelijcx brenghen,

 

In groote sonde en schult.

 

 

 

Ghebonden en gheuanghen,

 

Is my den sin en moet:

 

Ick hebbe so groot verlanghen,

 

Nae dijne hulpe goet.

 

Die ghy hier schenckt ons allen,

 

Die u bekennen bloot,

 

Waer door wy niet en vallen,

 

Diep in des duyuels schoot.

 

 

 

Een dinck is noch verbleuen,

 

Dat my hier wedersteeckt:

 

Tghelooue en is niet recht beseuen,

 

Daer rechte liefde ghebreeckt.

 

Wilt ons die liefde schencken,

 

Als eenen schat seer weert,

 

Dat wy daer door bedencken,

 

Wat de Wet van ons begheert.

 

 

 

O Heere Godt en Vader,

 

In dijnen hoochsten throon:

 

Sijt onser gheen versmader,

 

Aenhoort ons claghe ydoon:

 

Wilt toch van ons niet wijcken,

 

Want ghy zijt ons confoort,

 

Op dat wy hier niet af en strijcken,

[fol. 75r]

 

Van u Goddelijck woort.

 

 

 

O Vader vol ghenaden,

 

Ghy doet wat ghy toesecht:

 

Gheeft ons die hier can raden,

 

Den heylighen Gheest oprecht.

 

Dat wy niet anders handelen,

 

Dan vrede en gherechticheyt,

 

En dat wy moeghen wandelen,

 

In aller slechticheyt.

 

 

 

O Godt wilt ons toekeeren,

 

Dijn goetheyt excellent:

 

Wilt ons ghelooue vermeeren,

 

Helpt onse cranckheyt verblent.

 

Wilt onse herten roeren,

 

Met u Fonteyne claer,

 

Wilt ons ghenadelijck voeren,

 

Wt dese duysterheyt swaer,

 

 

 

Dijn hulpe doet op ons daken,

 

En oock u vriendelijckheyt:

 

Dat wy u niet missaken,

 

Door eenighe droefheyt.

 

Als wy ligghen in Boeyen,

 

Dijn ghenade niet van ons weynt,

 

Laet on ghestadich bloeyen,

 

Tot inden laetsten eynt.