Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse: Nun freucht euch lieben Christen, Oft op. Ausz tieffer noth schrey ich. Oft op den C XXX. Psalm.O Goede Godt in eewicheyt,
Onsen Vader en Heere:
Tot u weent al die Christenheyt,
Om u ghenade seere:
Laet die haest tot ons vloeyen claer,
Dat wy die sonden nemen waer,
En die voor u bekennen.
Want wy hebben ghesondicht veel,
Doende Afgoderije:
Met pracht, nijt, haet, vloecken, en speel,
Oock doende hoererije:
Met achterclap en ontrouwe groot,
Die wy ghedaen hebben seer bloot,
Listelijck teghen den armen.
Dijn Goddelijck woort hebben wy veracht,
| |
[Folio 72v]
| |
Ende niet waer ghenomen,
Dijn leere en weldaet niet bedacht,
Daerom is ouer ons comen,
Die Roede dijner straffen hier,
Daermet ghy staet en betert schier,
Die Schaepkens van dijnen stalle.
Met cranckheyt groot syn wy beuaen,
Daer door veel menschen steruen:
Met dieren tijt oock seer belaen,
Waer door die menschen verderuen:
Den Torck benauwet ons met macht,
Hy valt ons aen met syn heyrcracht,
Om die Christenen te moorden.
Nochtans can niemant spreken wel,
Dat ghy ons straft onbeschuldich:
Dijn straf verdienen wy, dy rebel,
Met sonden menichuuldich:
U straf en oordeel recht toegaet,
Ouer ons die daer hebben versmaet,
Dijn woort ende dijn gheboden.
Maer om dat ghy ons Vader zijt,
Willen wy niet aflaeten:
Te schreyen droeuelijck altijt,
Hoepende tonser baeten:
Als wy gheloouich u roepen aen,
Ghy en sult ons hier niet afgaen,
Maer ons bede wel aenhooren.
Daerom o Heer der guedicheyt,
Wilt onser nu ontfermen:
| |
[Folio 73r]
| |
Helpt dijne arme Christenheyt,
Ghedenckt aen ons groot kermen.
Gheschut, noch wapen gelden niet,
Als men u Heere niet helpen siet,
die Torcken voor ons drijuen.
Ghy hebt gheholpen dit is bekent,
Dat volck van Israhele:
Als hem den vyant was ontrent,
Brocht ghy die van sdoodes quele:
So deet ghy Heere Josue,
Dauidt, Judith, en Gedeon me,
So die schrift ons doet oorconden.
Als u dat volck vertoornet heeft,
Door sonden menigherhande:
En door misdaet den Goden gheeft,
Verboden Offerhande:
Haer Vyanden vielen int lant,
Verderuende met roof en brant,
Straffende Afgoderije.
Maer sy keerden weder tot dy,
Als sy benauwet waren:
En riepen daer om hulpe vry,
Biddende sonder sparen.
Doen hielpt ghy hem in haren noot,
En sloecht voor hem den vyant doot,
Om dijn volck daer te verlossen.
Daerom roepen wy u oock an,
In desen noot ghemeyne:
Om ons te helpen en is gheen man,
| |
[Folio 73v]
| |
Dan ghy o Godt alleyne.
Vergheeft ons sonden altemael,
Verlost ons van des doodes quael,
En wilt ons vyanden veriaghen.
O Godt Vader die niet beswijckt,
Wilt ons ghebet verhooren:
Dijn hulpe ouer u Schaepkens strijckt,
Wilt u vyants heyr verstooren:
Door dijnen Sone Ihesum Christ,
Vrijt ons van des Antechrists list,
So ghy ons claer hebt belouet.
O Jhesu Christe Godt ende Heer,
Wilt toch van ons niet scheyden:
Om u selfs goedicheyt en eer,
Laet ons van u niet verleyden:
Door dijn Menscheyt en bitter doot,
Verlost ons Heere wt allen noot,
En van der Godloosen banden.
O Heere Godt heylighe Gheest,
Wy bidden u al te samen:
Dat ghy verlosset aldermeest,
Die hier om dijne namen:
Strijden teghen die vyanden dijn,
Wilt hem o Heer behulpich zijn,
En by dijnen woorde behouden.
O Heere Godt in hoochsten throon,
Hooghe Drijuuldichede:
Een Vader, Godt, en Heere schoon,
Helpt ons in alle stede.
| |
[Folio 74r]
| |
Bewaert ons Heere als wy zaen,
Van hier verscheyden seer belaen,
Van allen quaden. Amen.
|
|