Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. O Herre Gott, dein Göttlich Wort. Oft op. Durch Adams fall ist gantz.VErblijt Verblijt u in desen tijt,
Ghy lieue Christenen alle:
Want nu in allen landen wijt,
Clinckt Godts woort met gheschalle:
Daer en is gheen man, diet weeren can,
Dat heb ick wel vernomen,
Godts woort seer claer, blijft eewich waer,
Den quaden als den vromen.
Adam, Adam, ghy vader grijs,
Hoe heuet u al gheganghen:
Nae uwen Val int Paradijs,
Hebt ghy Godts woort ontfanghen:
Hier door ghy zijt, beurijt altijt,
Beurijt en oock behouden,
Godts woort seer claer, blijft eewich waer,
Den ionghen en den ouden.
Noe, Noe, ghy Godes man,
| |
[Folio 57v]
| |
God heeft u wtuercoren:
Dat ghy syn woort oock namet an,
En heeft tot u ghesworen:
So dat ghy vliet, tswaters verdriet,
Synen tooren liet hy wijcken.
Godts woort seer claer, blijft eewich waer,
Den armen als den rijcken.
Abraham, Abraham, seer wel ghestelt,
Ghelooft Godt synen Heeren:
Tot gherechticheyt wort hem dat ghetelt,
Syn Zaet wou Godt vermeeren.
So heeft God zaen, hem al ghedaen,
Die op syn woort betrouwen.
Godts woort seer claer, blijft eewich waer,
Daerop moeten wy bouwen.
Loth, Loth, een man oprecht en goet,
Wou Godt twee Enghelen seynden:
En beual hem wt Sodoma met der spoet,
Te vlieden sonder omweynden:
Loth die ontran, en Godt hoef an,
Den Vierighen reghen te laten.
Godts woort seer claer, blijft eewich waer,
En compt ons al te baten.
Dauid, Dauid een Coninck en Heer,
Een man nae Godes wille:
Heeft aenghenomen Godes leer,
Voldoende Gods woort stille.
Godt beloeft fyn, dat hy sou syn,
Wt synen Zade gheboren.
| |
[Folio 58r]
| |
Godts woort eerbaer, blijft eewich waer,
In Hemel en Aerde vercoren.
Ihesus Christus Marien Soon,
Van den heylighen Gheest ontfanghen:
Wat alle Propheten seyden schoon,
Is op hem wtgheganghen:
Godt gheeft beuel, merckt dit al wel,
Wilt desen Sone hooren.
Godts woort eerbaer, blijft eewich waer,
Hem dient die eere aluooren.
Nu merckt, Nu merct en hoort met vliet,
Wat ons hier wort beschreuen:
Int Testament met goet bediet,
Daer wy nae moeten leuen:
Hier wort verclaert, ende vermaert,
Van Christo onsen Heeren.
Godts woort eerbaer, blijft eewich waer,
Laet ons dit neerstich leeren.
Matheus, Leui Euangelist,
Een man van den Tol gheropen:
Den eersten Cancelier worden ist,
En leert ons tot Jhesum lopen,
Christus die spreeckt, wat u ghebreeckt,
Compt ghy bedroefde alle.
Godts woort eerbaer, blijft eewich waer,
Tis troost in den misualle.
Marcus, Marcus, die ander is,
Die oock perfeckt wtbreydet:
Die wercken Jhesu Christi fris,
| |
[Folio 58v]
| |
Daermet hy elcken leydet:
Tot tghelooue reyn, dat ons alleyn,
Oprecht en goet can maken:
Godts woort eerbaer, blijft eewich waer,
In droeue en blijde saken.
Lucas, Lucas, in ordene staet,
Van hem blijft onuersweghen:
Hoe Godt ons in ghenade ontfaet,
En heel is toegheneghen:
Van Hemel fier, seyndende hier,
Sijnen beminden Soone.
Godts woort eerbaer, blijft eewich waer,
Die dit ghelooft staet schoone.
Iohannes, Johannes, den Jonghelinck,
Is oock die vierde worden:
Hy vuert dat woort met reyn gheclinck,
En leert ons Christum ingorden:
Tghelooue recht, en liefde slecht,
Leert hy voor allen soecken.
Godts woort eerbaer, blijft eewich waer,
Die waerheit en soeckt gheen hoecken.
Saulus, Paulus, een vercoren vat,
Die roert die rechte keerne:
En straft des werelts sonden plat,
Dat sy hier niet hoort gheerne:
Die werelt raest, haer hofghesin blaest,
Teghen Paulum, en den goeden.
Godts woort eerbaer, blijft eewich waer,
Godt salt seer wel behoeden.
| |
[Folio 59r]
| |
Paule Doctor der Heydenen net,
Die weerelt haet u schrijuen:
Want haer wijsheyt, ghy voor dwaesheyt set,
Haer werck wilt ghy verdrijuen:
Tghelooue reyn, seght ghy alleyn,
Moet salicheyt aengrijpen.
Godts woort eerbaer, blijft eewich waer,
Al willet die werelt wtslijpen.
Petrus, Jacobus, en Judas al,
Volghen oock dese leere:
En wijsen ons boete der sonden val,
Door Christum onsen Heere:
Tot hem alleen, en anders gheen,
Leeren ons snel loopen.
Godts woort eerbaer, blijft eewich waer,
Voor Beeren, en Leeuwen met hoopen.
O Mensche, mensche voecht u nu fijn,
Laet dijne verblintheyt varen:
Ghelooft die Schrift en die woorden zijn,
So sult ghy hier verwaren:
Dijnen sin en moet, en wat ghy doet,
Daerop wilt u verlaten.
Godts woort eerbaer, blijft eewich waer,
Toocht ons des leuens straten.
O Jhesu Christe Godes Soon,
Laet ons van u niet dwalen:
Op dat wy niet halen boosen loon,
En door menschen leeringhe falen:
Met schoonen schijn, vol van fenijn,
| |
[Folio 59v]
| |
Vercleyenen synen namen.
Godts woort eerbaer, blijft eewich waer,
Van nu in eewicheyt. Amen.
Looft Godt, Looft Godt in eewicheyt,
Ghy christenen al ghemeene:
Dat hy syn woort heeft wt ghespreyt,
Twelck is syn werck alleene:
Des menschen waen, helpt niet daer aen,
Hoe cloeck dat is syn ramen.
Godts woort eerbaer, blijft eewich waer,
Des singhen wy blijdelijck Amen.
|
|