Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. Es spricht der Unweysen Mundt. Oft op den XV. Psalm.OP desen dach ghedencken wy,
Dat Christus is opgheuaren:
Dies wy Godt lof sanck schencken vry,
| |
[Folio 44r]
| |
Biddende hy wil verwaren,
Ons arme sondaers in dit pleyn,
Die door veel sonden syn onreyn,
Totdat wy by hem paren.
Den wech is nu Godt danck ghemaeckt,
Den Hemel staet nu open:
Christus verwacht die nae hem snaeckt,
En met ghelooue hopen:
Die Godt vertrout mach syn verblijt,
En stellen hem tot aller tijt,
Den Heere nae te loopen.
Die niet en volcht, en den wille doet,
Des Heeren, sonder smetten:
Den Heere sal des vleesch en bloet,
Buyten syn rijcke setten:
Tgheloof alleen maeckt ons oprecht,
Nochtans moet tleuen wesen slecht,
Anders salt ons beletten.
In ons begont dees Hemelvaert,
Totdat wy den Vader aencleuen:
Vliedende hier des werelts aert,
Als Godts kinders beseuen,
Wiens ooghen tot Godt syn ghewent,
Met trouwe en liefde ongheschent,
Tot dat wy tsamen leuen.
Dan wort den dach van vruechden rijck,
Als Godt ons by hem sal laten:
En maeckt ons synen Sone ghelijck,
Verchieret bouen maten:
| |
[Folio 44v]
| |
Daer sal ons vruecht blijuen eenpaer,
In eewicheyt sonder beswaer,
Godt laet ons dit wel vaten.
|
|