Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. Ich sunfftz und klag, eil langer tag. Oft op. O Jesu zart Göttlicher art.EEn Enghel schoon, wt Godes throon,
Tot eender Maghet reyne,
Maria claer, ghesonden waer,
En quam tot haer alleyne,
Den Enghel snel, heet Gabriel,
Dat is gheseyt Godts cracht
Die dese Boodtschap bracht,
Hoe Godt nu dacht, smenschen gheslacht,
Wt allen noot, en eewighen doot,
Door synen Soon tontladen
Want gramschap groot, die werelt sloot,
By Lucifer den quaden.
Den Enghel fier, tot haer seer schier,
Sprack wt den mont des Heeren:
| |
[Folio 36r]
| |
Godt groet u hier, sonder dangier,
Met u is Godt, vol eeren,
Van Godt ghy zijt, ghebenedijt,
Bouen elck wijf ghepresen,
Wat mach, dacht sy dit wesen?
Die Maghet teer, bdroeft haer seer,
En vreeset niet, sprack dEnghel siet,
Van mijnes woorts aengheuen,
Ick doet ghebodt, van mijnen Godt,
Laet dat in u vast cleuen.
Nu hoort van my, wat ick sal dy,
Van Godes weghe verclaren,
Een kint sult ghy, reyn, net, en vry,
Ontfanghen ende baren,
Den Sone cleyn, Maegdeken reyn,
Sal Jhesus syn ghenaempt,
En groot syn ongheblaempt,
Hy sal oock fyn, ghenamet syn,
Een Sone ient, van Godt bekent,
En sal int huys regneren,
Van Dauidt wijt, nu en altijt,
Sonder eenich cesseren.
Die reyne Maecht, den Enghel claecht,
Wie heeft dit oyt ghesien?
Want gheenen Man, ken ick hier an,
Hoe sou dan dat gheschien:
Hy sprack verstaet, tis tuwerbaet,
Den Gheest sal op u dalen,
Diet al doet sonder falen,
| |
[Folio 36v]
| |
Door dien Gheest sterck, gheschiet dit werck,
Gheen mensche raet, hoe dit toegaet,
Tverstant ons hier beschaempt,
Daeromme sal, u kint van al,
Godes Sone syn ghenaempt.
Nu merckt en siet, wat nu gheschiet,
in des werelts ghestichte,
In haer coutheyt, ende outheyt,
Elizabeth u Nichte,
Die is nu swaer, tis openbaer,
En heeft een kint ontfanghen,
Ses Maenden schier verganghen,
Als onuruchtbaer, hiet sy voorwaer,
Maer al wat sy, can Godt doen vry,
Hier op Maria antwoorde:
Siet nu in eeren, die Maghet des Heeren,
My gheschie nae uwen woorde, van accoorde.
|
|