Een hantboecxken inhoudende den heelen Psalter des H. propheete Dauid

[fol. 35r]

Een liedt op den dach van die Suyueringhe Marie, dat is, Lichtmisse.

Op de wijse. Von Himmel hoch da kom ich her. Oft op: Wol dem der in Gottes forcht.

O Jhesu die om al ons profijt,
In armoede gheboren zijt,
Als ghy int Cribbeken wert gheleyt,
Gheen groote diensten hebt ghy verbeyt.

Ghy hebt u nae die veertich daghen,

In den Tempel wel laeten draghen,
Daer Symeon den ouden man,
U nam op syne armen dan.

Dat hy voor langhe ghebeden heeft,

Ghy hem met uwen leden gheeft,
Dies prijst hy Godt van herten gront,
Dat hy leefde ter seluer stont.

Een Weduwe Anna ghenaempt,

Die Prophetinne seer befaempt,
Die Godes woort vierich aenhinck,
Quam oock en sprack wonderlijck dinck.

Christe u volck wilt helpen fyn,

Dat wy dijns Gheestens kinderen syn,
Ons herten ghenadich u toekeert,
En uwen Gheest, die ons recht leert.

Op dat u woort ons altijt spijst,

Tot uwen Tempele ons hier wijst,
Daermen u prijst, ende lof secht,

[fol. 35v]

 

Met bidden, ende dancken recht.

 

 

 

Al watmen daer begheert van dy,

 

Dat gheeft ghy gheeren, en meer daer by,

 

Salich is hy die in u besluyt,

 

Eens compt, en niet en valt daer wt.

 

 

 

Hier toe helpt ons Christe altijt,

 

Die voor ons mensche gheboren zijt,

 

Dat wy door uwen heylighen naem,

 

Gheholpen worden, en syn bequaem.