Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. Gelöbet seistu Jesu Christ.GHeeft ons nu God dat ons ghesanck,
Met blijden ghelooue neme ganck,
Om u te wenschen een goet nieu Jaer,
En dat hyt met syn genade make waer. Alleluya.
Geen mensch, noch staet hier wasdom geeft,
Die Gods hulpe niet by hem heeft,
Om hem te leyden in aller stont,
Twelc my elck wenschen wt hertens gront. Alleluya.
Der Ouericheyt.
Der Ouericheyt dat sy haer ghewelt,
Van Godt aenneme ende recht bestelt,
Godt gheue hem neersticheyt ende moet,
| |
[Folio 30r]
| |
Om te beschermen dat recht is en goet. Alleluya.
Dat sy oock doen dat Godt hier prijst,
En dat Christus ons leert en wijst,
Blyuende by syn woort seer sterck,
Op dat hem niet en rouwe haer werck. Alleluya.
Den Ghemeynen volcke.
God gheue tGhemeynte gehoorsaemheyt,
Om tucht te vorderen met eerbaerheyt,
Oock ghemeyne liefde, met vredich bedrijf,
Dat een goet herte, hebbe een goet lijf. Alleluya.
Den Huysuaderen.
VVy wenschen elck huys en tvolck daer in,
Vredelijck leuen, en rechten sin,
Tot Godes lof, ende eere altijt,
Diet huys en hof ghebenedijt. Alleluya.
Den Knechten ende Dienstmaechden.
VVillich int dienen zijt trouwe en stil,
Vreedsaem, zedich, nae Godes wil,
Christus die is oock uwen knecht,
Die dit gelooft die dienet recht. Alleluya.
Den ghetrouden Persoonen.
Die ghetrouwet leuen in vrede rijck,
En draghen lief en leet ghelijck,
Die zijn een vleesch, een herte en gheest,
Wil Godt ghenadich helpen meest. Alleluya.
Den Jonghers.
Ghy Jonghers leert eerst vreesen Godt,
En hout altijt syn heylich ghebodt,
| |
[Folio 30v]
| |
Wilt wassen op, tuchtich gheleert,
Op dat ghi elck bely, en Christum eert. Alleluya.
Den Vaderen, Moederen, ende Schoolmeesteren.
Die van herten, sinne, en moet,
Om ons te leeren arbeyt doet,
Op dat wy leuen nae Godts beuel,
Den sal God helpen, en loonen wel. Alleluya.
Den ionghen Ghesellen ende Dochteren.
Die ionghe Ghesellen al Ghemeyn,
Die Dochterkens oock die hout Godt reyn,
En gheeft hun cuyscheyt in sin en moet,
Om te verwinnen vleesch en bloet. Alleluya.
Den Crancken.
Ghy crancke met smerten beladen swaer,
Nacht en dach in lijden eenpaer,
Godt gheef u ghedult tot aller stont,
En wil u maken van herten ghesont. Alleluya.
Die met eenich cruyce beladen zijn.
Aenuechtinge, kerkren, droefheit, geschrey,
Groote veruolghinghe menigherley,
Wilt willich lijden wel bereyt,
Godt helpt u draghen al sulck leyt. Alleluya.
Den Armen.
Godt wil u Armen gheuen in noot,
Wat u behoeuet, met daghelijcx broot,
Aen lijf ende siele onghemist,
| |
[Folio 31r]
| |
En lijdtsaemheyt door Jhesum Christ. Alleluya.
Den Arbeyderen.
Die daghelijcks in den arbeyt syn,
Om wijf en kint te gheneren fyn,
Den wenschen wy een goeden spoet,
Met Godes hulpe, diet al doet. Alleluya.
Den Rijcken.
Die tydelijck goet ende rijckdom heeft,
En daer by met sorghen leeft,
Die deyle dat wt nae Christus ghebot,
Op dat hy rijcke sy by Godt. Alleluya.
En wilt oock soecken tghemeyn profijt,
Den armen helpet sonder respijt,
En leert u kinderen dit aduijs,
Dat is den rijcken grooten prijs. Alleluya.
Allen Sondaren.
Ghy sondaers soeckt dat eewich deel,
Dat u Godt die sonden vergheuet heel,
Hy bekeer u al door syn woort claer,
En make u salich hier en daer. Alleluya.
Den Predicanten.
Die ons met erenst tghelooue leeren,
Van valsche leere ende leuen keeren,
En drijuen Godes woort ende werck,
Den gheue Godt syn ghenade sterck. Alleluya.
Tbesluyt.
Dit wenschen wy van herten al,
Om Godt te behaghen in dit dal.
| |
[Folio 31v]
| |
Een eerlijck volck, en heylighe stat,
Die hem op Godt verlaten plat. Alleluya.
Syn Goddelijcke hant die sy ons by,
Bewarende ons van schanden vry,
En gheue ghenadich veel Jaren goet,
Met syner liefde, in voorspoet. Alleluya.
|
|