Een hantboecxken inhoudende den heelen Psalter des H. propheete Dauid


Een liedt van die besnijdenisse. T.B.
Op de naeuolghende wijse.
[Folio 29r]
Godt heeft een eewich verbont ghestelt, Met Abraham ende allen, Die hy hem seluen heeft toeghetelt, Nae zijnen wel gheuallen. Tverbont dat streckt hem in dat vleesch, En sou toch eewich blijuen, Alleen tghelooue nae Godes heesch, Die menscheyt doet beclijuen. In syn selfs lyf besneden wiert, Een kint van vrouwen zade, Nae tsvaders wesen, God versciert, Neempt ons aen wt ghenade. Als Christus nu besneden was, Dat vleesch moeste voorder steruen, Daeromme liet hy dat dooden ras, Maer tsamen niet verderuen. Tvleesch heeft hy selue op doen staen,
[Folio 29v]
Met hem tot eewich leuen, En so versterckt zijn verbont zaen, Voor ons eyghen heeft hy hem ghegheuen. Hy is nu onse, ende blijft, By ons sonder vermijden, Want hy heeft hem die inghelijft, Die Christum hier belijden. Dit is tverbont met Abraham, Dat wy in Christo leeren, Vermenicht is syn edel stam, Bouen tal der Sterren des Heeren.