Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
Auteursrechtvrij
[Folio 23r]
| |
Op den naeuolghenden thoon. Christum willen wy louen schoon,
Der reyner Maghets Maria Soon,
So wijt die schoone Sonne streckt,
En aller werelt eynde reckt.
Den Salichmaker aller ding,
Nam aen eens knapens lijf ghering,
Op dat hy tvleesch door tvleesch verwarf,
Eer dat zijn schepsel heel verdarf.
Godes ghenade van Hemel groot,
Haer in die reyne Moeder goot,
Een Maghet droech des Hemels pant,
Twelck der natueren Wet niet vant.
Dat zedich huys der herten cleyn,
Wort eenen Tempel Godes reyn,
Die gheen man kent, noch oock en port,
Beurucht van Godts woort, vonden wort.
| |
[Folio 23v]
| |
Die edele Moeder heeft gheboren,
Den Gabriel voorsey te voren,
En Sint Jan met springhen voorsach,
Doen hy in Moeders Lichaem lach.
Hy lach in t Hoey met armoey groot,
Die herde Cribbe hem niet verdroot,
Seer cleyne melck zijn spijse diet,
Die noyt gheen voeghel hongher liet.
Des Hemels Choor verblijt hier of,
Die Enghels singhen Gode lof,
Den armen Herderen wordt vertelt,
Den Heer en maker aller welt.
Lof, eer, en danck sy u alleyn,
Christe gheboren des maghets reyn,
Met den Vader en heylighen Gheest gheseyt,
Van nu tot inder eewicheyt. Amen.
|
|