Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. Es seind doch selig alle die. Oft op den C XIX. Psalm.Als Jhesus Christus ghebenedijt,
Wiste dat comen was den tijt,
Dat hy van hier sou scheyden:
Aen Tafel met zijn Jongheren sadt,
Dat Paeschlam hy oock met hun adt,
| |
[Folio 10r]
| |
Opt laetste voor zijnen lijden.
Van herten sprack hy, heb ick begheert,
Met u, eer my die doot aenueert,
Dit Paesschelam te eten:
Van nu voortaen seg ick u al,
Van desen ick niet meer eten sal,
Dan in mijns Vaders rijcke gheseten.
Als hy aen Tafel met hun sat,
Heeft hy stilswijghens ghemerckt dat,
Tghelooue en herte beyde:
En stelde daer in een Sacrament,
Nemende in dhandt dat Broot present,
Brackt, gaft hen ende seyde:
Neemt daer en eet, dat is mijn Lijf,
Dat voor u aen dat Cruyce stijf,
Ghegheuen wordt vol weerden,
Dit doet en ghedenckt my daer by,
Dat ick u Verlosser en Heere sy,
Die hier ghelooft op eerden.
Diesghelijcken opt selue pas,
Alst Auondtmael gheeyndet was,
Sterckte hy zijn Apostelen teere:
Volmakende dit dierbaer pant,
Nam oock den Kelck in zijn hant,
Dancksegghende sprack die Heere:
Neemt, drinckt Al hier wt, dit is mijn Bloet,
Des nieuwen Testamentes goet,
Twelck ick aent cruyce crachtich,
Verghieten voor u sonden sal,
| |
[Folio 10v]
| |
Sulcks doet als ghy hier drincket al,
Mijnder zijnde ghedachtich.
Ghelijck als Godt in Egipten groot,
Alle Eerste gheboren liet slaen doot,
En dat in eene Nachte:
Den Coninck Pharo oock verdranck,
In die rooy Zee, ende verzanck,
Met zijnen heelen heyrcrachte:
Doen stichte Godt den Paesschedach,
Om tsvolcks bedencken dat daer sach,
Sijn groote wonder wercken,
Want sy werden daer al beurijdt,
Met stercker hant, vant Slaefhuys wijdt,
Door die rooy Zee int mercken.
Alsoo doet Christus onsen Heer,
Door zijnen bloede int doopsel meer,
Daer hy versmoort ons sonden.
Den doot hy doodet, die helle hy stoort,
Thandtschrift dat die consciencie moort,
Heeft hy aent Cruyce ghebonden.
En op dat zijn Kercke dit dincke altijt,
Maeckt hy hem seluen een Paeschlam subijt,
Int Testament daer hy stichte,
Sijn Lichaem teten in dat Broot,
In Wijn te drincken zijn Bloet root,
Door synder woorden ghewichte.
Die van dit Broot teten bedinckt,
en van den Kelcke des Heeren drinckt,
Die moet zijn doot verconden:
| |
[Folio 11r]
| |
Dat is dat Christus Godes Soon,
Aent cruys betaelt heeft den vollen loon,
Voor onser aller sonden:
En dat ons Godt ghenadich sy,
Die dit gheloouen en oock daer by,
Aen onsen Doop vast cleuen,
Soo sullen wy Godes kinderen zijn,
En tRijcke Christi crijghen fijn,
Dat ons Godt eewich wil gheuen.
Die mensche betaste hem seluen ient,
Eer hy ontfangt dit Sacrament,
Dat hy bekenne zijn herte:
Oft hy int rechte Ghelooue staet,
En met die waerachtighe liefde gaet,
Dat hem die sonde niet smerte:
Dat hyt Gherechte en eete niet,
Om dat hy gheen verschil en siet,
Tusschen dat Lichaem des Heeren,
Hy moet der sonden Suerdeech eest,
Afdoen door hulpe des heylighen Gheest,
Christo dat Lam ter eeren.
Daerom laet ons nu alle ghelijck,
Godt onsen Vader in Hemelrijck,
Met gantschen herten beden:
Door Christum onsen Aduocaet,
Die voor al onse missedaet,
Den doot eens heeft gheleden:
Dat hy door den heylighen Gheest,
Met stercken Ghelooue altijt vermeest,
| |
[Folio 11v]
| |
Om na zijn woort te leuen,
In rechter liefde en eenicheyt,
En dat hy ons nae dees cranckheyt,
Die eewighe vrede wil gheuen.
|
|