Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp den naeuolgenden thoon. Tot der Jordanen Christus quam,
Nae zijnes Vaders willen:
Van sint Jan hy den Doop daer nam,
Sijn werck en ampt veruullen:
| |
[Folio 8v]
| |
 Daer woudt hy stichten ons een badt,
Te wasschen ons van sonden,
En om die doot te worghen plat,
Door zijns selfs bloet en wonden,
Dit gou een nieu versch leuen.
Nu hoort en merckt wel menschen al,
Wat Godt self heet dat doopen,
En wat een Christen gheloouen sal,
Te mijden Ketters hoopen,
Godt spreeckt en wil dat water zij,
Maer niet alleen slecht water,
Sijn heylich woordt is oock daer by,
En den rijcken Gheest gheen verlater,
Die is alhier den Dooper.
| |
[Folio 9r]
| |
Dit heeft hy ons bewesen claer,
Met wercken en met woorden,
Des Vaders stemme openbaer,
By der Jordanen sy hoorden:
Die sprack: Dit is mijn lieue Soon,
In hem heb ick gheuallen,
Den wil ick u beuelen schoon,
Dat ghy hem hoort in allen,
En volghet zijne leere.
Den Sone Godts hier selue staet,
Godt en Mensch in persoone,
Den heylighen Gheest hem nederlaet,
In sduyuen beeldt ydoone,
Op dat wy twijffelen souden niet,
Als wy ghedoopet werden,
Van drij Persoonen den Doop gheschiet,
Die by ons hier op eerden,
Om te woonen hemselfs gheuen.
Den Heere zijn Jonghers beueelt,
Gaet wilt die wereldt leeren,
Dat die verloren door sonden queelt,
Tot leetschap hem wil keeren:
Die gheloouet, en hem Doopen laet:
Salicheyt daer door verweruet.
Een nieu gheboren mensch hy staet,
Die nu niet meer en steruet,
Den Hemel hy beeruet.
Die niet en ghelooft dit groote goet,
Die blijft in zijne sonden,
| |
[Folio 9v]
| |
En is verdoempt ter hellen gloet,
Diep in des doots afgronden,
Sijn heylicheyt en helpt hem niet,
Al zijn werck is verloren,
Die Erfsonde maeckt dit verdriet,
Daer in hy is gheboren,
Hem seluen can hy niet helpen.
Die ooghe siet dat water alleyn,
Als ander water ghieten,
Tghelooue, des Gheests crachten reyn:
In Christi bloet siet vlieten:
En is voor hem een roode vloet,
Met Christi bloet bestreken:
Dat alle wonden heelen doet,
Door Adam inghesteken,
En door ons oock vercreghen.
|
|