Een hantboecxken inhoudende den heelen Psalter des H. propheete Dauid


Een ander compositie vant Vader onse,
op den naeuolghenden thoon. Och Vader onse die daer zijt,
[Folio 7r]
Int hemelsch beurijt, Hooch ouer ons, dies ghy in den gheest, Wilt aenghebeden wesen: Dijn heylich Name sy vermeest, Vry en onbeureest, Op aerden in ons, breet ende wijt, Als in den Hemel ghepresen: Dijn rijck ghenadich ons toewent, En laet ons vast blijuen, Wat u mishaghet hier present,
[Folio 7v]
Wilt dat wt ons verdrijuen, Op dat wy moeghen altijdt bekent, In uwen rijcke verstijuen. Met rechten Heere bidden wy, Dijnen wille laet vry, Op eerden hier gheschieden reyn, Als in des Hemels throone, Want niemandt comen can by dy, Hoe groot hy sy, Dan die zijnen wille hier alleyn, Met u vereenicht schoone: Gheeft ons heden, ons daghelijcx broot, En die siele hare spijsen, Twelck is u Goddelijck woort, seer bloot, Dat wijt hooren en prijsen, Daer door ghy ons tot der salicheyt groot, Den rechten wech doet wijsen. Oock onse schult ende misdaet, Heer ons quijtlaet,
[Folio 8r]
Waer door wy u vertoornen hier, Wilt ons die niet toemeten, Want wy ons schuldenaeren met baet, Quijten sonder haet, Daer met sy ons misdeden schier, En willent heel vergheten: Laet ons in quellinghe vallen niet, Waer door wy mochten verderuen, Voor sulcken quade hulpe biet, Daer door die siele sou steruen, En maeckt ons Heere nae dit verdriet, In dijnen rijcke eruen.