Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
Auteursrechtvrij
[Folio 5v]
| |
Op den naeuolghenden thoon. Vader onse in Hemelrijck,
Ghy die ons alle hert ghelijck,
Broeders zijn, en u roepen aen,
Wilt dit bidden van ons ontfaen,
Gheeft dat alleen niet bid den mondt,
Helpt dat het coemt van herten grondt.
| |
[Folio 6r]
| |
Gheheylicht worde uwen name alleyn,
U woordt by ons helpt houden reyn,
Dat wy oock leuen heylichlijck,
Nae uwen name weerdichlijck,
Behoedt ons Heer voor valsche leer,
Dat arm verdoelde volck bekeer.
Toecoem ons u rijck in deser tijt,
En oock hier nae int eewich iolijt,
Den heylghen Gheest die woon ons by,
Met zijne ghauen menigherley,
Des Duyuels toorn en groot ghewelt,
Heer breeckt, voor hem u Kerck behelt.
Dijn will geschie Heer God ghelijck,
Op Aerden als in Hemelrijck,
Gheeft ons ghedult in slijdens pijn,
Ghehoorsaem in lief en leet te zijn,
Weert en keert alle vleesch en bloet,
Dat teghens uwen wille doet.
Gheeft ons heden ons daglijcx broodt,
En watmen behoeft tot sleuens noodt,
Behoedt ons Heer voor twist en strijt,
Voor sieckte en voor dieren tijt,
Dat wy in goeden vrede staen,
Doet sorg en giericheyt van ons gaen.
Al onse schult vergheeft ons Heer,
Dat sy ons niet bedroeuen meer,
Als wy oock onsen schuldenern,
Haer schult en fault vergheuen ghern,
Te dienen maeckt ons al bereyt,
| |
[Folio 6v]
| |
In rechte liefd en eenicheyt.
En leyt ons Heer in becoring nicht,
Als ons den boosen gheest aenuicht,
Ter slincker oft ter rechter handt,
Helpt ons doen stercken wederstandt,
Vast int gheloof met goedt propoost,
En door des heylighen Gheestes troost.
Aan alle quaden ons ontslaet,
Tzijn die tijden ende daghen quaet,
Verlost ons van den eewighen doot,
En troost ons inder lester noot,
Doet ons een salich onderstandt,
Neemt onse siel in uwe handt,
Amen, dat is het werde waer,
Sterckt ons ghelooue ymmers daer,
Op dat wy daer niet en twijflen aen,
Dat wy hier mede gebeden haen,
Op dijn woordt inden name dijn,
Soo spreken wy dat Amen fijn.
|
|