Een hantboecxken inhoudende den heelen Psalter des H. propheete Dauid


Dat Christelijcke ghelooue in ghesancks wijse ghestelt, op den naevolghenden thoon, door D. Martinus Luyther. Wy gheloouen aen eenen Godt alleyn, Scheppers Hemels en der Eerden, Die hem heeft voor een Vader gegeuen reyn, Op dat wy zijne kinderen werden:
[Folio 2v]
Hy wil ons altijdt gheneeren, Lijf ende siele oock wel verwaren, Al ons ongheluck wil hy weeren, Gheen leet sal ons teghen varen, Hy sorghet voor ons, vrijt ons, en wacht, Alle dinghen staen in zijne macht.
[Folio 3r]
Wy gheloouen oock al aen Jhesum Christ, Sijnen Sone, en onsen Heere, Die eewich by den Vader is, Ghelijcker Godt van macht en eere, Van Maria der Jonckurouwen, Is hy ware mensche gheboren, Door den heylighen Gheest in vertrouwen, Voor ons die daer waren verloren, Aent Cruyce is hy gestoruen, ende vanden doot, Door Godt is hy verreesen sonder stoot. Wy geloouen oock aenden heyligen Gheest, Een Godt met den Vader en den Sone, Die alle bedroefden troostet eest, Ende met gauen scieret schoone, Die gantsche Christenheyt beseuen, Doet hy in eenen sin vast cleuen, Die sonden hier worden vergheuen, Dat vleesch sal noch weder leuen, Nae desen iammer, is bereyt, Ons een leuen in der eewicheyt.