Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse. Vatter unser im Himmelreich. door S.H.ICk gheloof in God almachtich die leeft,
Den Vader die gheschapen heeft,
Door zijn woort Hemel ende aerde fris,
Wiens ghenade ouer ons eewich is,
| |
[Folio 3v]
| |
Die ons Lijf, Siel en neeringhe gheeft,
En om zijns Soons wille lief heeft.
Ick gheloof aen Jhesum Christum goet,
Den eenighen Godes Sone zoet,
Wt den Vader eewich gheboren fijn:
Door wien alle dinghen gheschapen zijn,
Die ons tot aller salicheyt quam,
En al ons sonden aen hem nam.
Die so dEnghel Gabriel seyde eest,
Ontfanghen is vanden heylighen Gheest,
Van Maria die Maghet reyn:
God en Mensche is gheboren certeyn,
Die ons doort Euangelie gent,
Sijns Vaders name maeckt bekent.
Die hem voor onse sondighe daet,
Aen thout des cruycens offeren gaet,
Onder Pilato met ghedult:
Om te betalen onse schult,
Hy verlost ons al wt allen noot,
Door zijn reyn bloet, en bitter doot.
Hy is ghestoruen, en gheleyt int graf,
En is ter Hellen ghedalet af,
Des duyuels rijck verstoort hy, en werck,
En bant hem daer met ketens sterck,
Dat hy ons niet meer letten can,
Die Ihesum Christum hebben an.
Hy verrees vanden doot, ten derden dach,
Die doot men haer macht verliesen sach,
Daer nae voer hy ten Hemelen schier,
| |
[Folio 4r]
| |
Heerlijck met zijnen scharen fier:
Hy sidt ter Rechterhant des Vaders fijn,
En beschermt dat Christen Ghemeynte zijn.
Van daer hy wedercomen sal,
Met grooter macht ende gheschal,
Om alle menschen te rechten schoon,
En elck te gheuen zijnen loon,
Den die gheloouen des Hemels iolijt,
En den Godtloosen der Hellen strijt.
Ick geloof aen God den heyligen Gheest,
Die ons leert kennen des waerheyts keest
Die vanden Vader en Sone wtgaet,
En door den Propheten tot onser baet,
Spreeckt, en ghetuycht onsen gheeste versint,
Dat Godt ons als zijn kinders bemint.
Een Christen Ghemeynte geloouich fijn,
Daer in Christus dat hooft wil zijn,
En blijft daer in tot in den endt,
Door zijn woordt en zijn Sacrament,
Door deser gemeynschap Tghemeynte heeft,
Die gheestelijcke gauen die Christus gheeft.
Alle sonden gheloouick in dit leuen,
Door Christum alleen te zijn vergheuen,
Ons die ghecocht zijn met zijn bloet,
En ghedoopt in zijnen name zoet,
Waer met wy Godt behaghen ghemeyn,
En doort Ghelooue zijn wy reyn.
Ick ghelooue dat dit verstoruen lijf,
Niet altijt inden doot blijft stijf,
| |
[Folio 4v]
| |
Want tvleesch sal weder nieu opstaen,
En in dat eewich leuen gaen,
Daer wy by God in eewicheyt,
Met Christo hebben vrolijckheyt.
Die dit ghelooue heeft voorwaer,
In Godts ghenade staet eenpaer,
En sal tot goede wercken fijn,
Met liefde altijt gheneghen zijn,
Dat gheeft ons Christe taller tijt,
Die des gheloouens grondtsteen zijt.
|
|