Een hantboecxken inhoudende den heelen Psalter des H. propheete Dauid

[fol. 1r]

Den Catechismus op liederen wijse ghemaeckt, waer af dat eerste liedt is die X. gheboden. Exodi xx. ende Deuteronomii v.

Dit zijn die thien gheboden reyn,
Die ons gaf Godt den Heere alleyn:
Door Moysen zijnen dienaer fraij,
Hooch op den berch van Zinaij. Kirieleyson.

Ick ben alleyn, u Godt, u Heer,

Gheen Goden en sult ghy hebben meer:
Op my sult ghy vertrouwen vry,
En van herten gronde liefhebben my. Kierieleison.

Ghi en sult ghebruycken den name siet,

Met oneere dijnes Godes niet:
Ghy en sult niet houden goet, of recht,
Dan dat God selue doet of secht, Kirieleison.

[fol. 1v]

 

Ghy sult heylighen den seuenden dach,

 

Opdat ghy en u huysghesin rusten mach:

 

U wercken ghy oock laten moet,

 

Op dat God zijn werck in u doet. Kirieleyson.

 

 

 

Ghy sult eeren en ghehoorsaem zijn,

 

Den Vader, ende die Moeder dijn,

 

Helpt hem als dienen hem can u handt,

 

Soo sult ghy lanck leuen int landt. Kirieleyson.

 

 

 

Ghy en sult met tooren niet slaen doot,

 

Met haet of nijt wreeckt niet uwen noot,

 

Maer hebt ghedult, en coelen moet,

 

En doet oock uwen vyandt goet. Kirieleyson.

 

 

 

Ghy sult u trouwe houden certeyn,

 

Dat oock u herte gheen ander en meyn:

 

Suyuer houdt al dat leuen dijn,

 

Met zeden, en soberheyt fijn. Kirieleyson.

 

 

 

Ghy en sult niet stelen gelt noch goet,

 

Niet woeckeren yemandts sweet oft bloet:

 

Wilt open doen u milde handt,

 

Den armen die zijn in u landt. Kirieleyson.

 

 

 

Ghy en sult gheen valsche tuyghe zijn,

 

Liecht niet ouer den naesten dijn,

 

Sijn onschult sult ghy spreken wt,

 

Sijn schande deckt ende besluyt. Kirieleyson.

 

 

 

Ghy en sult ws naesten wijf noch hof,

 

Begheeren niet, noch yet daer of,

 

Ghy sult hem wenschen soo veel goet,

 

Als u, u herte selue doet. Kyrieleyson.

 

 

 

Dees gheboden ons ghegheuen zijn,

[fol. 2r]

 

Dat ghy u sonden, o mensche fijn,

 

Bekennen sout, en leeren snel,

 

Hoemen voor Godt sal leuen wel. Kirieleyson.

 

 

 

Hiertoe helpt ons Heer Jhesu altijt,

 

Die onsen Middelaer gheworden zijt,

 

Want met ons werck ist al ghedaen.

 

Wy verdienen niet dan tooren zaen. Kirieleyson.