Een hantboecxken inhoudende den heelen Psalter des H. propheete Dauid

Psalm CXLIIII. Benedictus Dominus Deus.

Is een dancksegghinghe, voor de weldaden die Godt de weerlijcke Ouerheydt bewijst, dat het al Godts gauen syn, ende niet menschen doen en is, ende hy bidt Godt teghen de valsche leeraers, ende onghehoorsame Onderdanen, die hun nae Godts woordt niet en willen reguleeren.

Op de wijse. O Herre Godtt erbarme dich. Oft op den LI. Psalm.

ICk danck den Heere, den troost mijn,
Die mijne handen leert strijden fijn,
En mijne vinghers oorloghen,
Noyt vyandt en heeft hem bedroghen:
Mijn goetheit, en mijn beschudding voorwaer
Mijn schilt, en mijn verlosser dats clear,
Ick betrouw hem die my bemint,
En die mijn volck onder my dwingt:

[fol. 185v]

 

Wat is doch de mensche lieve Heer?

 

Dat ghy u zijns doch aenneemt soo seer?

 

Oft wat is doch des menschen kindt?

 

Dat ghy hem soo acht, ende bemindt:

 

Ghelijck niet: soo is doch de mensche.

 

 

 

Hy en is niet dan enckel ydelheydt,

 

Glijck een schaey soo vergaet zijnen teijdt:

 

Neycht u vanden Hemel schoone,

 

Daelt aff, wilt u verthoonen:

 

Roert de berghen aen, so roocken sy,

 

Laet blixemen, en vestroeytse vry,

 

Verschricktse, schiet uwe stralen,

 

Van de hoochte laet uwe handt dalen:

 

Verlost ende beschermt oock my,

 

Vande groote wateren, dat bid ick dy,

 

En vander vreemder kindren handt,

 

Want hun leer is onnut in alle landt,

 

En valsch zijn oock hun wercken.

 

 

 

O Godt een nieu liedt sing ick u,

 

Ick wil spelen opten Psalter nu,

 

Mijn Luyte, en Harp sal clinghen,

 

En met thien Snaren singhen:

 

Ghy die den Coninghen victorie gheeft,

 

Verlost doch nu die grooten noodt heeft,

 

Uwen knecht Dauidt vande boosen,

 

En van tsweerdt der Godloosen:

 

Verlost my oock en beschermt my snel,

 

Vander vremder kinderen handt fel,

 

Welcker leer is onnuttelijck,

[fol. 186r]

 

En hun wercken zijn oock valsch alle glijck,

 

En valsch is oock al haren handel.

 

 

 

Op dat onse Sonen, opwassen bly,

 

Glijck de ionghe plantzoenen vry,

 

En ons Dochters oock fraey, en wel,

 

Glijck Tpalleys, van uwen Tempel:

 

Onse Cameren die laet oock vol zijn,

 

Met oueruloedicheyt allommentom fijn,

 

Laet oock onse Schapen ghepresen,

 

Altijdts moeghen vruchtbaer wesen:

 

Laet onse Ossen arbeyden wel,

 

En laet ons gheen schade toecommen snel,

 

Laetter gheen verlies zijn op ons straet,

 

Salich is tvolck dient alsoo gaet,

 

En diens Heere dat Godt is.

 

 

 

Eer sy den Vader, en den Son. etcetera. 4.