Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse vanden LXXXV. Psalm. Oft op den XCVI. Psalm. Oft op de naeuolghende melodye. Heer ick wil u dancken alleyn,
In den raet van den vromen soet:
Van gheheelder herten in de Ghemeyn,
Want Godts wercken zijn groot en goet:
So wie datse acht die heefter lust aen,
| |
[Folio 148r]
| |
 Wat hy ordineert datz heerlijck zaen,
En zijn rechtuaerdicheyt die blijft eewlijc staen.
Een ghedachtenis heeft hy ghemacht,
De gnadghe en bermhertighe Heere,
Op datmen zijn wonderwercken bedacht:
Die hem vreesen, spijst hy seere,
Hy ghedenckt eewlijck aen zijn verbondt,
En sal zijn volck oock talder stondt,
Sijnder wercken cracht maken condt.
Godt die sal door syn rechtuaerdicheyt,
Hun gheuen der Heyden erfgoet:
Sijnder handen wercken dat zijn waerheyt,
En syn recht datz oprechtelijck goet:
Sijn gheboden zijn oock oprecht alleglijck,
Sy worden ghehouden oock eewelijck,
En gschieden, gtrowlijck, en redlijck.
Verlossing hy synen volcke sendt,
Sijn verbondt dat blijft eewelijcke:
Op dat synen naem worde bekendt,
Die heylich is, en heerlijcke.
De vreese des Heeren die is voorwaer,
Dbeghinsel der wijsheyt dat is claer,
En sy behoedt in alle vrees en vaer.
| |
[Folio 148v]
| |
Seer goet verstandt hebben die al,
Die daer nae doen gwillichlijcken:
En die Godt louen met groot gheschal,
Want zijn lof blijft eewelijcke:
Nu syn volck voecht u doch te samen,
Om te louen des Heeren namen,
En laet ons spreken vrolijck, Amen.
|
|