Een hantboecxken inhoudende den heelen Psalter des H. propheete Dauid

Psalm. CX. Dixit Dominus Domino meo.

Is eene Prophecije van Christo, hoe dat hy Dauids Heer, ende oock eewigher Godt is, ende dat hy op het eerdtrijck door dEuangelie eene Kercke sal beghinnen, ende eenen eewighen Priester sijn sal, ende dat hj sijn volck ghebenedijden ende oock ouer alle sijne vyanden regneeren sal, al ist dat hy te voren moet ghecruyst worden, ende steruen, maer en sal nochtans inden doot niet blijuen.

[fol. 146v]

Op de wijse. O Herr wer württ sein wonung han. Of op Es ist das Heil uns kommen her. Oft op den XV. Psalm.

DE Heer die sprack in synen hoochsten Troon,
Tot Christum mijnen Heere:
Ghy zijt mijnen eenighen gheborn Soon:
U behoort toe de Godlijcke eere,
Daeromme tot mijn rechte handt u sedt,
Tot dat ick leg al u vyanden nedt,
Tot een Schabbel van uwen voeten.

De Heer die sal oock wt Zyoon,

Uwe rijcks Septer u seynden,
U woort sal aldaer beghinnen schoon,
En gaen tot aen swerelts eynde,
Oock regneert ghy also voorwaer,
Ouer alle uwer vyanden schaer,
Dat sy hun sonden moeten boeten.

Als ghy sult door het lijden dijn,

De sond, en den doet bestrijden,
So sal tvolck willich u offren fijn,
Met heylighen ciraet en blijde:
U kindren die worden u gheboren,
Ghelijck den coulen dauw wtvercoren,
In den dagheraet smorghens vroeghe.

De Heer heeft ghesworen certeynelijck,

En ten sal hem niet berouwen:
Ghy zijt eenen Priester eewelijck,
Om den dienst Godts nieu op te bouwen,

[fol. 147r]

 

Nae dordinancij van Melchisedech:

 

Doud offrand die moet dan gheheele wech,

 

Als ghy u sult laten dooden.

 

 

 

Doch sal Godt altijdts by u zijn,

 

En staen aen uwer rechten:

 

En straffen die met de eewighe pijn,

 

Al die ghene die teghen u aenuechten:

 

Als hy synen toornighen grim aengrijpt,

 

De Coninghen hy dan ontsucken smijdt,

 

En hy neemtse gheel wech met machten.

 

 

 

Hy sal oock heerlijck met grooter macht,

 

Ouer alle de Heyden ordeelen:

 

Hy sal doen so menighen grooten slacht,

 

Teghen die so hem verachten gheele,

 

Hy sal den Prince van deser wereldt,

 

Die hem altijdts tegehen hem steldt,

 

Sijn helsche rijck gheheel breken.

 

 

 

In swackheyt, lijden, cruys, en doodt,

 

Sal hy hier tijtelijck steruen:

 

Maer sal ouerwinnen allen noodt,

 

En alle Godts goeden eruen.

 

Oock sal hy verrijsen op den derden dach,

 

Op dat hy eewlijck regieren mach,

 

Een Coninck ouer Hemel, en deerde.

 

 

 

Daer voor wy hem segghen lof en eer,

 

Dat wy dien Salichmaker haben,

 

Singhen, en verblijden ons dies al seer,

 

En dancken hem voor sulcke gauen:

[fol. 147v]

 

Oock ghelijck hijt ons door zijn woordt bediet,

 

Ist dat wijt gheloouen, ende twijflen niet,

 

So sullen wy salich worden.