Een hantboecxken inhoudende den heelen Psalter des H. propheete Dauid

[fol. 144r]

Psalm. CVIII. Paratum cor meum Deus paratum.

Is eene dancksegghinghe om dat Godt soo bermhertich is, ende ons syn woort gheeft, ende dat hi den Regenten sijne ghebenedijdinge, ende de victorie tegen haren vjanden geeft.

Op de wijse. Nun freucht euch lieben Christen.

GOdt mijn hert dat is bereyt voorwaer,
Om te dichten, en om te singhen:
Staet op Souter, en Herpen clear,
Inden dagheraet wil ick ontspringhen,
En ick wil u dancken o Heer mijn,
Onder het volck so wil oock fijn,
U lof singhen, en hun sulcks segghen.

Want u goetheyt Heer so groot is,

Tot aen des Hemels troone,
U waerheyt die streckt so wijdt ghewis,
Tot aende wolcken schoone,
Verheft u al ouer den Hemel,
Heer Godt, en laet u eer doch snel,
Ouer alle landen comen.

Op dat u lieue vrienden al,

Verlost doch moghen werden:
U recht handt die helpe oueral:
En verhoort my doch hier op eerden,
Oock spreeckt Godt in zijnen heylichdom,
Dies ick ben blijd: en wil Sichem drom,
Deylen, ende oock afmeten.

[fol. 144v]

 

Dat dal Suchodt, en Gileadt is mijn,

 

Manasse is oock mijn eyghen goet,

 

De cracht mijns hoofts is Ephraim fijn,

 

En mijnen Prince is Juda soet,

 

Moab dat is mijnen Waschpodt,

 

Ick wil oock mijn schoenen sonder spodt,

 

Al ouer Edom wtworpen.

 

 

 

Ouer die Philister ick iuychtzen wil,

 

En wie wilt my doch leyden?

 

In een stercke Stadt, secreet en stil,

 

In Edom wie sal my daer leyden?

 

En sult ghy dat niet doen Heere Godt?

 

En oock niet wt trecken sonder spodt?

 

Met ons Heyr, en met onsen Legher.

 

 

 

Doet ons bystandt o Heere Godt,

 

En inden noodt wilt het bewijsen.

 

Smenschen hulp is gheen nudt, tis maer spodt,

 

Maer uwen naem willen wy prijsen,

 

Met Godt willen wy groote feyten doen,

 

Hy sal ons vyanden wel stoudt, en koen,

 

Met zijn voeten tondertreden.

 

 

 

Eer sy den Vader en den Soon. etcetera. 1.