Een hantboecxken inhoudende den heelen Psalter des H. propheete Dauid


Psalm CI. Misericordiam et iudicium cantabo. Is een huysleeringhe, hoe dat een yeghelijck in sinen beroep neerstich syn, Godsalichlijck leuen, ende alle erghernisse mijden, ende principalijcken syn huisghesin in goeder disciplijne, ende tucht houden soude.
Op de wijse vanden. C XIX. Psalm. VAn uwe ghenade, recht, en goet, Sing ick, o Heer die my behoedt, Met vruechden wil ick lofsinghen: Den onschuldghen wech dien gaen ick nu, Tot dat mijn ooghen sullen sien u: Wanneer sult ghy doch tot my springhen? Ick gaen oprechtlijck sonder abuys, Mijn hert is oprecht in mijn huys, Nae u ick seer verlanghe: Ick wacht my voor de boosheyt sterck, En hate der ouertreders werck, Op dat sy my niet aen en hanghen. Een verkeert hert van my wijcken moet, En die heymelijck achterclap doet,
[Folio 134r]
Dien wil ick nemen het leuen: Ick mijde de stouten, en hoochmoedighen, En maer op die en sien mijn ooghen, Die hun tot der waerheyt begheuen: De vrome sal nu mijnen dienaer zijn, Gheen bedriegher en comt in het huys mijn, Den loegenaer ick van my keere, De schalcken verdrijf ick wt het landt, De quaetdoenders wtroey ick tallen candt, En wt de Stadt Godt des Heeren. Lof eer en prijs, met soeten thoon. etcetera. 5.