Een hantboecxken inhoudende den heelen Psalter des H. propheete Dauid

Psalm. LXXXIII. Deus quis similis erit tibi.

Is een ghebedt voor de Christelijcke Kercke teghen alle hare vyanden.

Op de wijse. Es seind doch selig alle die, im. Oft op den C XIX. Psalm.

O Godt swijcht niet, noch en zijt niet stil,
En beydt niet lang, dats mijnen wil,
U vyanden rasen, en dullen:
En die u haeten die steken op,
Met valsche pracktijcken, haeren cop,
En teghen u volck sy brullen:
Sy bestormden gheren met liste fijn,
Die onder u bescherminghe sijn:
Maer ghy sult die heymlijck beurijen,
Welaen segghen sy: herwaerts doch comt,
Wy willense wtroeyen, tot op den grondt,
Op datse gheen volck meer en sijen.

[fol. 116r]

 

En dat niemandt en ghedencke meer,

 

Aen Israel, sy rotten hun seer,

 

Eenen raet hebben sy ghesloten:

 

Sy maken een verbondt teghen u,

 

Die Edomiter die rotten nu,

 

Ismael comter toe met vloten,

 

Moabiter, Hagarener, (?)

 

Gebal, Ammon, Palestiner,

 

Amaleck, Titus, Aser,

 

Hun heeft vergadert dese rodt,

 

Sy zijn gelijck geworden den kinderen van Loth,

 

Straftse glijck Jabin aen dwater.

 

 

 

Verworchtse glijck de Madianiter

 

Glijck Sisaram, en Endorner,

 

So wordense al tot slijcke:

 

Hun Princen die maeckt ghelijck Oreb,

 

Zalmana, en ghelijck Seeb,

 

En die daer segghen al ghlijcke:

 

Wy willen innemen Godes huys?

 

Maeckt die doch Heer alsoo confuys,

 

Glijck een omloopende wile,

 

Glijck stroo dat vanden winde breeckt,

 

Glijck tvier dat een groot Bosch aensteeckt,

 

Als vlammen die de berghen vernielen.

 

 

 

Wiltse alsoo veruolghen fel,

 

Met u onweder, ras en snel,

 

Maeckt hun aenghesicht te schande:

 

Op datz o Heer doch soecken u,

 

Nae u vraghen, en hun schamen nu,

[fol. 116v]

 

Verschricktse in alle landen:

 

Laetse doch worden eewelijck,

 

Beschaemt, en vergaen alle ghelijck,

 

Op datse eens leeren weten:

 

Dat ghy alleen Heer zijt ghewis,

 

En dat uwen name alleen is,

 

De hoochst ouer deertrijck gheseten.