Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
Auteursrechtvrij
[Folio 114v]
| |
Is eene vermaninge aende weerlijcke Ouerheydt, dat sy hun Officie neerstelijck doen souden, en voor de ghiericheyt hun wachten, ende den Armen helpen souden, waert niet, so soudese Godt verworpen. | |
Op de wijse. Der torecht spricht es ist kein Gott. Oft op den LIII. Psalm.GOdt die inde Ghemeynte Godts staet,
En is eenen rechten Richter,
Onder den Goden vroech, en spaet,
Dauid der Psalmen dichter,
Die seyt: hoe lang wilt ghy tonrecht?
Ordeelen, en aennemen slecht,
De Goddeloose persoonen,
Aenmerckt hoe Dauid hier doet vermaen,
Het valsche Recht van ons te staen,
Noch tquaet niet te verschoonen.
Den Armen, en den Weesen, doet recht,
Dallendighen helpt doch seere,
En den nootdurftighen, dies en wilt slecht,
U niet van dat recht is afkeeren,
Maer maeckt dat hy tzijnen rechte com,
Met onrecht en laet hem niet leyden om,
Den verachten wilt oock kennen,
Wilt oock verlossen de Armen,
Vanden Godloosen die och armen,
De vrome in noodt wilt brenghen.
Maer sy en willens niet verstaen,
Noch gheensins sy dat en achten,
| |
[Folio 115r]
| |
Inde duysternis sy blijuen gaen,
Daerom moeten vallen met crachten,
De fondamenten aen allen candt,
Van hun gheheel contrey en landt,
Wantz niet regeeren met bscheyde,
Ghelijckt hun van Godt beuolen is,
Maer ordelen al met menschen list,
Daer door sy hun seluen verleyden.
Ick heb wel gheseyt, dat ghy Goden zijt,
En des alder hoochsten kindren,
Doch sult ghy glijck menschen metter tijdt,
Afsteruen, niet te mindren:
En te grondt gaen eenen tyran ghelijck,
O Heer Godt van ons doch niet wijckt,
Maer besorcht u volck op deerde:
Met een regiment also veruaet,
Dat men u daer in regeeren laet:
Op dat wy salich werden.
Godt maeckt u op, ordeelt het landt,
Want ghy zijt een erfheere:
Ouer de Heyden, u is oock becandt,
Aller menschen herten teere:
O Godt, ghy den rechten Rechter mijn,
Ordeelt ons, nae u goetheyt fijn,
Oft wy gaen geheel verloren:
Want in ons is maer alle boosheyt,
Voorcomt ons met u rechtuaerdicheyt,
Oft wy blijuen onder uwen thoren.
| |
[Folio 115v]
| |
O Heere Godt, wilt doch sien aen,
Dit wy zijn dwerck uwer henden,
Vleesch, en bloet, niet goets ghedoen en can,
Daerom wilt u ghenad ons senden:
En gheuen dat ons ghebreeckt gheheel,
Maeckt dat wy vrolijck voor het ordeel,
Bestaen en u rijcke eruen, (.?)
Als ghy houden sult dordeel ghemeen,
Dwelck onghestraft en laet niet een,
Die in hare sonden steruen.
|
|