Een hantboecxken inhoudende den heelen Psalter des H. propheete Dauid


Psalm. LXXVI. Notus in Iudea Deus, in Israel. Is een dancksegghinghe dat Godt syn Kercke aldaer syn woordt, ende den rechten Godtsdienst is, ghenadelijck wilt beschudden, ende hare vyanden wille te niete doen.
Op de wijse vanden voorgaenden Psalm. Oft op. Wo Gott der Herr nicht. Oft op den C. XXIIII. Psalm. Godt is in Juda bekent seer wel, Te Salem is schoon zijn Tente:
[Folio 107v]
Synen naem is groot in Israel, Sijn goetheyt woont in Zyon gente, Daer heeft hy ghebroken, Schilden, Peerden, De Pylen, de Boghen, en oock de Sweerden, En oock de gheheele orloghe. Der Roouers Triumph, en gelijckt u niet, Ghy condtse al haest beroouen: Al glijcken sy den wilden dieren yet, Noch schouwen sy u sterckheyt Hooghe, Sy slapen ghelijck al waer het nacht: Te niet gaet allen hun cracht, en macht, Gheensins en helpt oock rijckdom. Soo hou als ghy scheldt o Jacobs Godt, So vallen in slaep waghens en peerden, Verschricklijck verghelt ghy sonder spodt, Als ghy tvonnis velt hier op eerden: Deertrijck vreester af, en het wordt stil, Als Godt opstaet, en ordeelen wil, En verlossen hier alle de Armen. Als de menschen teghen u wueten seer, Dan Triumpheert ghy eerst met eeren: Beloeft Godt, en houdet, en brengt meer, Gschencken den verschricklijcken Heere, Den vreeslijcken Heer, schenckt ghiften goet, Hy beneemt den Princen haren moet, De Coninghen hier voor hem vreesen. Eer sy den Vader en den Soon. etcetera. 1.