Een hantboecxken inhoudende den heelen Psalter des H. propheete Dauid


Psalm. LXV. Te decet himnus Deus in Sion. Is een dancksegghinghe voor alderhande gauen, dat Godt de sonden vergheeft, syn woort onderhoudt, ende ons verhoort, oock dat hi ons pays, de gebenedijdinghe, ende alderhande vruchten gheeft.
Op de wijse. O Herr wer württ sein woning han, Oft op den XV. Psalm. IN Zyon loeftmen u, o Godt, Ghy hoort oock alle ghebeden: Ons misdaden die zijn seer groot, Vergheeft ons ouertreden: Salich is hy dien ghy hebt vercorn, Om te woonen in uwen Palleys vorn, Dien en sal niet ghebreken. O Godt door u rechtuaerdicheyt, Wilt ons verhooren gnadelijcke, Ghy zijt de hoep, van daertrijck breyt, En vander Zee diesglijcken:
[Folio 91r]
Ghy onderhoudt de berghen met cracht, Ghy stilt de Zee baren, door u macht, En het rasen van allen volcke. En die daer woonen aen swereldts eyndt, Van u teecknen sy verschricken: Ghy maecktse blijde en onghescheyndt, Als u hulp hun comt bequicken: De gheel werelt besoeckt u goetheyt, Och gheeft den vruchten waters planteyt, U goetheyt verciert het Jare. Daer wast wat goets, al waer ghy gaet, Vol zijn oock die Woestijnen: Die hoeulen hebben van u groote baet, De Beesten oock tallen termijnen, Der Schapen wol die gheeft ons cleeren, Die Velden staen vol Zaets: dies Heere, Louen sy u, ende singhen. Eer sy den Vader en den Soon. etcetera. 1.