Een hantboecxken inhoudende den heelen Psalter des H. propheete Dauid

Psalm. XLI. Beatus uir qui intelligit super egenum.

Is inden eersten eene schoone beloftenisse, dat Godt den ghenen rijckelijc wederom betalen wilt, die Christum oft yemanden vanden synen yet goets doen, daer nae so bidt Christus tegen syn vyanden, ende claecht ouer den Iudas, ende hy bidt dat hem Godt wt den doot helpen wilt.

Op de wijse. O Herr wer württ sein wonung han, Oft op den XV. Psalm.

[fol. 69v]

 

SAlich is hy die dArmen altijt,

 

Bewijst goede weldaden:

 

Die sal verlost worden in quaden tijt,

 

Door Godt van alle quaden,

 

Sijn leuen sal dan behouden zijn,

 

Op daerd salt hem wel gaen: noch in zijn,

 

Vyandts handt en salt hy hem gheuen.

 

 

 

De Heer sal hem bequicken fijn,

 

Als hy sieck leyt in smerten,

 

En zijne rustplaets omkeerende zijn,

 

Als hy cranck is van herten:

 

Ick seyde: Heer ontfermt u my,

 

Gheneest mijn Siele, want ick heb vry,

 

Teghen u swaerlijcken ghesondicht.

 

 

 

Mijn vyanden veel quaets alle glijck,

 

Segghen: wanneer sal hy steruen?

 

En synen name eewelijck,

 

Met hem gheheel verderuen:

 

Sy commen wel om te besien yet,

 

(Maer hun hert dat en meynes niet)

 

Ten is maer om wat te berispen.

 

 

 

Sy ginghen wt en verbreyden dat:

 

En alle die my haten,

 

Soecken teghen my een oorsaeck pladt,

 

Om my eens te moghen vaten,

 

Sy raetslaghen veel quaets teghen my:

 

Ja hebben alree een stucxken vry,

 

Ouer my schoon besloten.

 

 

[fol. 70r]

 

Als hy leyt, en sal hy niet wedrom opstaen,

 

Mijn vrindt dien ick betroude,

 

Die mijn broodt adt, my nu (wel aen)

 

Gheren met voeten treden soude:

 

Maer O Heer Godt onfermt u my,

 

Helpt my doch op, en staet my by,

 

Soo wil ickse betalen.

 

 

 

Daer aen merckten ick dat ghy haet,

 

Aen my een goet behaghen,

 

Midts dat ghy ouer my niet en laet,

 

Mijnen vyandt blijschap draghen:

 

Maer ghy hebt my O Heer mijn Godt,

 

Om mijn onschult oock inden noodt,

 

Verlost, ende onderhouden.

 

 

 

Ghy hebt oock voor u aensicht recht,

 

My ghestelt eewelijck Heere:

 

Gheloeft sy Godt die my wedrom oprecht,

 

En verkiest mijn leuen teere:

 

Om te prijsen zijne bermherticheyt,

 

Van nu af tot inder eewicheyt,

 

Door Jhesum Christum, Amen.