|
| |
Psalm. XL. Expectans expectaui Dominum, etcetera.
Is een Prophecij dat Christus nae syn verrijsenisse het Euangelie in de geheele werelt laten verbreyden soude, op dat Godt van veel menschen gheloeft mocht worden, ende datter veel hun hope op hem setten mochten, maer dat het Ioodendom, ende den godtsdienst van Moyses een eynde hebben soude.
| |
Op de wijse. An wasserflussen Babylon, da. Oft op den C XXXVII. Psalm.
Ick verbeyde den Heere, want hy,
Neycht hem, om my te verhooren:
Hy trock my wt den grachte vrij,
Daer in ick lach tot den ooren:
Hy halp my wt den modder, en tslijck,
| |
| |
En stelde mijne voeten ghelijck,
Op een Steenrotz hooch bouen:
Hy heeft bereyt oock mijnen ghanck,
In mijn mondt ghegheuen een nieu gsanck,
Om hem daer mede te louen.
Dit sullender veel sien: en vreesen,
En Godt den Heere betrouwen:
Salich is hy en ghepresen,
Die op Godt hoep sonder verflouwen,
En die by den hoouaerdgen niet gaet,
Noch wandelt met den loegnaers quaet,
Heer Godt veel wonders ghepresen,
Hebt ghy ghedaen: wie is u ghelijck?
U ghepeysen zijn seer wonderlijck,
Die ghy aen ons hebt bewesen.
Die wil ick nu gaen vertellen,
En een yeglijcken openbaren,
Datz te veel zijn om die te tellen:
U behaghen oock niet voorware,
Sacrifici, noch Spijsoffrandt:
Maer ghy hebt mijn ooren playsandt,
Opghedaen: dies ick hoorden gherne:
Dat ghy noch Brandoffranden goet,
Noch Sundoffranden, met Bocxbloet,
Van niemanden niet en begheerden.
Doen seyde ick: siet hier com ick,
Int boeck staet van my gheschreuen:
Om te doen uwen wil ghewillick,
| |
| |
Daer toe word ick ghedreuen:
Uwen wet die is in my bereyt,
Om te preeken van u rechtuaerdicheyt,
Siet: ick en sal tot gheender stondt,
Gheensins toehouden mynen mondt,
Dat weet ghy Heer alleyne.
Ick en heb uwe rechtuaerdicheyt,
In mijn herte niet verborghen:
Van u waerheyt, ende salicheyt,
Spreeck ick tsauens, en smorghens,
Ick en verswijg u ghenade: siet,
Inde groote Ghemeynte niet,
Daerom en laet niet varen,
Van my Heer u barmherticheyt:
Maer u goetheyt, ende waerheyt,
Die moeten my altijts bewaren.
Soo veel onglucx my omringt heeft,
Dat icks niet ghesegghen en can:
Mijn misdaet my soo aenghegrepen heeft,
Dat icker gheensins af ghesien en can:
En sy zijn meer dan alle mijn haer,
Soo ick op mijn hooft heb voorwaer,
Ja mijn hert heeft my verlaten,
Laet u behaghen dat ghy my,
Verlost Heer: daerom haest doch ghy/
Om my thelpen bouen maten.
Laetse doch al ter schanden gaen,
En oock seer beschaemt worden:
| |
| |
Die mijn Siele soo seer nae gaen,
Om die snel te vermoorden:
Laetse oock ouer rug vallen al,
En ghescheynt worden ouer al,
Die my quaets gunnen, en quellen:
Oock moeten sy ghescheynt worden me,
Die daer van my segghen he, he,
Godt salz oock ter aerden vellen.
Laetse blijde en vrolijck zijn,
En die u salicheyt beminnen fijn,
Sullen segghen in alle hoecken:
Gheloeft sy de Heer, met luyder stem:
(Want ick Allendich, en Arm ben)
De Heer voor my sorchuuldich is,
Myn verlosser en helper is hy ghewis,
En beydt niet lang O Heer, Amen.
|
|
Auteursrechtvrij