Een hantboecxken inhoudende den heelen Psalter des H. propheete Dauid

Psalm. XXX. Exaltabo te Domine quoniam.

Is eene dancksegghinghe dat Godt in sieckten, ende in noot des lichaems geholpen, ende het leuen doen behouden heeft.

Op de wijse, Mein Seel erhebt den Herren mein. Oft op. Nun welche hie ir Hoffnung. Oft op Gebenedeiet sey die heilig. Oft op, Durch Adams fal ist gantz. Oft op den C XXV. Psalm.

ICk wil den Heer verhooghen seer,
Want hy maeckte dat ick op stont:
Laet doch mijn vyanden niet meer,
Ouer my lachen, met haren mont:
Doen ick u Heer Godt,
In mynen noodt,

[fol. 51v]

 

Aenriep, en te voete viele,

 

So hebt ghy terstont,

 

My ghemaeckt ghesont,

 

En verlost wt de Hel mijn Siele.

 

 

 

Ghy hebt behouden het leuen mijn,

 

Daer dander varen in dHelle:

 

Daerom lofsinghen, en vrolijck wilt zijn,

 

Ghy heylghen met stemmen helle,

 

Danckt den Heeren,

 

Laet ons vermeeren,

 

Die ghedachtnis van syne heylicheyt,

 

Want hy en schudt niet,

 

Op ons eenich verdriet,

 

Noch zijn gramschap inder eewicheyt.

 

 

 

Eenen ooghenblick soo duert synen torn,

 

En door synen wil wy leuen:

 

Op dat wy niet souden gaen verlorn,

 

So en duert maer ons suchten en beuen,

 

Des auondt spaey,

 

Maer smorghens fraey,

 

Beroemde ick my met vrolijckheyt,

 

Stoutlijck ick sprack,

 

Doen my niet en ghebrack,

 

Ick sal wel blijuen in der eewicheyt.

 

 

 

Want Heer Godt door den wille dijn,

 

Hebt ghy mynen berg macht ghegheuen:

 

Maer doen ghy verborgde u aenschijn,

 

Door verschricktheyt werdt ick beuen,

[fol. 52r]

 

Dies ick voortaen,

 

Wil u roepen aen:

 

En u Heer aenbidden voorware,

 

Wat isser dan goet?

 

Aen mijn vleesch en bloet,

 

Als ick inde verderfnis wech vare.

 

 

 

Sal dan het stof oock dancken u?

 

En vercondighen die getrouwheyt dijn?

 

Daerom Heer zijt mijns gnadich nu,

 

Verhoort my, zijt den helper mijn:

 

En u dancken mach,

 

Dat ghy mijn gheclach,

 

Verkeert hebt, in danssen, en vruechden,

 

Ontlast van tswaer pack,

 

Wtgheschudt mijnen sack,

 

En my omghegordt met vruechden.

 

 

 

Op dat u Heer lof sing mijn eer,

 

En nimmermeer ghestilt en werde:

 

Om te dancken, en prijsen u mijn Heer,

 

So lang ick leef hier op eerden:

 

En nae dit leydt,

 

Inder eewicheyt,

 

Alleen tot lof uwe naeme:

 

Door Jhesum Christ,

 

Die my verfrist,

 

U gtrouwheyt te vercondghen Amen.