Een hantboecxken inhoudende den heelen Psalter des H. propheete Dauid

Psalm. XXVII. Dominus illuminatio mea.

Is een ghebet dat ons Godt leyden, ende beschudden, ende ons by syn woort houden, ende voor de vyanden ons bewaren wille.

Op de wijse. An wasser flussen Babylon, da. Oft op den C XXXVII. Psalm.

DE Heer is mijn salicheyt, en licht,
Voor wien soud ick my grouwen:
De Heer is, die mijn leuen sticht,
Dat can een yeglijck aenschouwen:
Want als de quade vyanden mijn,
Mijn vleesch willen verslinden fijn,
Soo moeten sy ter neder vallen:
Al bestrijde my een groot heyr seer,
Soo en sal mijn hert niet vreesen meer,
Hoe luy sy oock brullen alle.

Alsser coemt oorloghe teghen my,

Dan wil ick my op Godt verlaten:

[fol. 49v]

 

En om een saeck den Heer bidden vrij,

 

Oock eysschen sonder aflaten:

 

Dat ick in sheeren huys blijuen mach,

 

Dat ick zijn glorij daer oock sien mach,

 

En nae synen Tempel mach vraghen:

 

Want hy heeft my ghecleedt subijdt,

 

In synen Troon, en alst is quaden tijdt,

 

Soo verborgt hy my wt ghenaden.

 

 

 

Op een Steenrotz verhoocht hy my,

 

Hy sal oock verheffen ter deghe:

 

Mijn hooft ouer mijn vyanden vry,

 

Die om my so zijn gheleghen:

 

Dan wil ick in synen Troone goet,

 

Lof offrandt gheuen metter spoet,

 

En den Heer louen tallen daghen:

 

Verhoort mijn stem ick roepe daglijcks.

 

Sijt mijns ghenadich, verhoort altijts,

 

Mijn hertlijck suchten, en claghen.

 

 

 

Ick wil soecken u aensicht Heer,

 

En wilt dat niet van my keeren:

 

Verstoot uwen knecht doch niet soo seer,

 

Want ghy zijt mynen bystandt Heere:

 

Verlaet my niet, noch en doet vrij,

 

U salighe handt gheensins van my,

 

Want my hebben verlaten,

 

Mijn Vader, en mijn Moeder, dats claer:

 

Maer de Heer die heeft my voorwaer,

 

Opghenomen in zijn straten.

 

 

 

Heer wijst my uwen wech, en baen,

[fol. 50r]

 

Onderworpt my niet svyandts wille,

 

Want teghen my seer veel opstaen,

 

Valsch ghetuyghen inder stille:

 

Ick ghelooue dat ick noch sien sal,

 

Nae mijn begheert sheeren goetheyt al,

 

In dlandt der Leuenden oock woonen.

 

Verbeydt den Heer, en zijt ghetroost:

 

In allen u voornemen, en propoost,

 

Verbeydt vastlijck den Heere.