Een hantboecxken inhoudende den heelen Psalter des H. propheete Dauid
(1565)–Anoniem Hantboecxken inhoudende den heelen Psalter des H. propheete Dauid, Een–
AuteursrechtvrijOp de wijse vanden eersten Psalm. Oft op den C XXIIII. Psalm.BEschermt mi Heer, want in onschult ic gaen
En ick hope vast op u Heere:
| |
[Folio 46v]
| |
Bewaert, en beproeft my van stondaen,
Reynicht mijn hert, en nieren seere:
Want voor mijn ooghen is u goetheyt,
In u waerheyt wandle ick alteyt,
En ick woon niet by quade liedens.
De boose die schou ick, aen allen candt,
Noch en sidt niet by Godloose schare:
Onschuldich soo wassche ick mijn handt,
En ick houd my aen uwen Oultare:
Heer ick vertel al uwe weldaet,
En ick haet de Godloosen quaet,
En u huys ick seer beminne.
Van quaet gheselschap mijn Siel behoedt,
Die nae dbloet dorsten alomme:
Die gheerne gheschencken hebben goet,
En gaen met quae rancken omme:
Verlost my Heeren zijt gnadich my,
Mijnen voedt die gaet recht, flijf, en vry,
Inde vergadring wil ick u louen.
Eer sy den Vader en den Son. etcetera. 1.
| |
[Folio 47r]
| |
 Nae myne onnooselheyt Heer:
Alle sonden woud ick gheren myden,
En leuen nae uwe leer:
Godt mach icks wel betrouwen,
Ende seker op hem staen:
Mijn saken op hem bouwen,
Ten heeft my noch noyt gherouwen,
Soo mach ick altijts bestaen.
Ondersoeckt doch mijn nieren,
Met tvier beproeft mijn hert:
In uwen wech wilt my stieren,
Dat is mijns herten beghert:
| |
[Folio 47v]
| |
Dat ghy zijt waerachtich en soo goet,
Dat neme ick voor my alleen,
Dies staet dan alle mijn ghemoet,
Om te temmen, mijn vleesch, en bloet,
In allen mijn doen, en laten ghemeen.
Ick en souder niet gheren by woonen,
Dat valsche liedens zijn:
Die hun daghelijcx verthoonen,
Int braggeren en ydelen schijn:
Veel min by die zijn in cluysen,
Salmen my vinden niet,
Die eeten der Weduwen huysen ,
Heymlijck sy listich muysen,
Te doen deuangelie verdriet.
Ick haet soo seer die Kercke,
Van den valschen Gheestelijcken staet:
Van leecken ende Clercken,
Des Paus Ghemeynte quaet:
Oock alle die hun doen, en dichten,
Met haren Godloosen mondt,
Palleeren, en allen hun stichten,
Alsment siet by den lichten,
Soo en hevet doch gheenen grondt.
Qualijck can ick by hun gheblijuen,
Godt gheef waer ick comme te landt:
Al soudense my verdrijuen,
In onschult wasch ick noch mijn handt:
Om uwen Outaer Heere,
Daer gaen ick ronsom om,
| |
[Folio 48r]
| |
Van daer en sal ick niet keeren,
Noch teghen tcruys my stellen seere,
tot dat ick tot u com.
Daer sal ick eerst vernemen,
Het danckbaer lofghesanck:
Dwelck ick my niet en sal schaemen,
Alle mijn leuen lanck:
Ja selfs vercondighen mede,
U groote beroemde daet,
En alle de wonderlijckhede,
Die Christus selue dede,
Ende bewees tot onser baet.
Uwen hof, en huys, staet schoone,
Daer ghy in woonende zijt:
Uwen Tabernakel, en Troone,
Daer in men u eert altijt:
Die selfste plaetz en stede,
Bemin ick van herten grondt,
In u woordt staetse beschreuen,
Mijn toeuerlaet is sy ghebleuen,
Ghelijck ghijt segt met uwen mondt.
Daerom wilt niet toegheuen,
Noch consenteren schoon:
Dat mijn Siel, lijf, en leuen,
Ontfanghen sou den loon:
Der sonden, al niet den honden,
Noch met die bloetgierighe rot,
Want u passie en u wonden,
| |
[Folio 48v]
| |
En wat aen u wordt gheuonden,
Dat blameren sy met spodt.
Tsy buyten, oft oock binnen,
In vrede, oft in strijt:
Met vyanden, oft met vrienden,
Het sy nae, breet, oft wijdt:
Het bloetstorten sy drijuen,
De Heeren, en oock die Knecht,
Voor hun can niemandt blijuen,
Sy willen die al ontlijuen,
Die segghen: datse doen onrecht.
Gheen quaet en is haren handen,
Te groot, noch oock te swaer,
Tghelt verblindtse, dat het is schande:
En oft oock al wel ghedaen waer,
Dat sy hun so laten besteeken,
En nemen vol hun handt:
Trecht, Tvonnis, Pays, sy breeken,
En met arghe listighe treeken,
Regieren sy tvolck ende dlandt.
Hoe soud ick dan connen ontsluypen,
Wt sulcken grooten bedwanck:
Secretelijck wech gaen druypen,
Twil my doch vallen te lanck:
Uwer gnaden wil ickt beueelen,
Dat ick voorts, glijck tot noch toe,
Van hun quaet niet met en deele,
Aen u houd ick my gheheele,
Met onnooselheyt ick dat doe.
| |
[Folio 49r]
| |
Mijnen voet en sal niet wijcken,
Hy staet op de rechte baen:
Hoochmoet, vernuft, en dier ghelijcken,
Maken twist, en dwalinghe saen:
Daer af sal ick zijn ontslaghen,
Als ick van u Heer alleyn,
Lof, prijs, en eer, sal saghen,
Stoutlijck ende onuerslaghen,
Voor den Raet, en dgheheele Ghemeyn.
|
|
