Een hantboecxken inhoudende den heelen Psalter des H. propheete Dauid


Psalm. XIII. vsquequo Domine obliuisceris. Is een ghebet, teghen die droefheyt, ende die swaermoedicheyt des Gheests, oock dat ons Godt vertroosten, ende helpen wille.
Op de wijse. Ausz tieffer noth. Oft op den C XXX. Psalm. Oft op de naeuolghende wijse. Och Heer hoe lang, vergeet ghy my? By nae, tot aen het eynde: Och Godt, hoe lang u aensicht bly? Sult ghy noch, van my weynden: Hoe lang soud ick selfs, raden my?
[Folio 13r]
En mijn Siel benaudt worden vry? En daghelijcx beancxt mijn herte? Hoe lang wordt mijn vyant verhoocht slecht? Siet Heer, wilt my verhooren: Verlicht oock, mijn ooghen te recht, En laet my dat orbooren, Dat ick niet en slape inden doot, Dat mijn vyandt hem niet beroem bloot, Dat hy my heeft ouerwonnen. Viel ick in sonden, oft in leydt, Mijn vyandt soud dan, bly op springhen: Maer ick hoep in u bermherticheyt: Dies wil ick, den Heere singhen. Mijn herte verblijdt, in u hulpe soet, Die my beghift, met soo veel goet, Synen name wil ick prijsen. Den Heere Godt van Hemelrijck, Lof, prijs, en eer ick leeste, Godt Vader, Godt den Soon, diesglijck, En Godt den heylighen Gheeste: Sijn heerlickheyt, barmherticheyt, Almachticheyt, en heylicheyt, Sijn eewich, sonder eynde.