De gheestelycke vryagie

(1624)–Anoniem Gheestelycke vryagie, De– rechtenstatus



[pagina 278]
Dit is een soete iubilatie van de Bruydt oft Christen ziele, naer dat sy haeren Bruydegom ontfanghen heeft. Iesus soete ghedenckenis, Is 'therte oprechte verheughenis, En bouen alle lieffelijckheydt Is soet zijne teghenwoordicheydt. O weest ghegroet o Iesus soet, V liefde mijn ziele quelen doet. Gheen sanck en is soo minnelijck, Gheen ghehoor alsoo ghenoechelijck, Niet wordt bedacht soo soetelijck, Als Iesus Koninck van Hemelrijck, Och weest ghegroet, &c. Iesus hope voor den penitent Secretelijck maeckt ghy v bekent, Die v soeckt wordt door v bekint, Dat wordt ghewaer die v hier vindt. Och weest ghegroet, &c. Iesus des herten soeticheydt, Leuende fonteyne en klaerheydt Te bouen gaende alle vrolijckheydt, En al der zielen begheerlijckheydt. Och weest ghegroet, &c.
[pagina 279]
Gheen tonge en kan wel wtgespreken, Door letteren kan't niet worden begrepen, Die't ondervint die macht bekinnen VVat dat het is Iesum te beminnen. Och weest ghegroet, &c. Iesus Koninck seer wonderlijck, Edel triumpheerder in v Rijck, Soeticheydt onwtsprekelijck Sijt ghy, en heel begheerelyck. Och weest ghegroet, &c. Heer blyft met ons, en ons bewaert, En door v licht toch ons verklaert: Verdrijft des herten donckerheydt, Vervult met suyuer klaericheydt. Och weest ghegroet, &c. Als ghy ons herte visiteert, VVordt d'ongeschickte droefheyt verteert Des werelts ydelheydt wert veracht Door uvver liefden stercke kracht. Och vveest ghegroet, &c. Iesus v liefde bouen alle soedt, Verheught seer vvel des herten gemoet, En is duysentmael meer aenghenaem Dan vvy tot segghen zyn bequaem. Och vveest ghegroet, &c.
[pagina 280]
V liefde blyckt vvt v lyden groot En vvt het storten van v bloedt roodt VVaer door dat ons geschoncken is Den vrede Godts, en de verlossenis Och vveest ghegroet &c. Alsulcken lief-hebber vveder bemint Op dat liefde door liefde sy bekint In den geur der minnen loopt vlietelyck Gheeft minne voor minne eeuvvelyck Och vveest ghegroet &c. Iesus leer kinnen allegaer Begheert sijn suyuer minne eenpaer Brandende in sijnder liefden soet Soeckt hem met eenen vlietighen moedt Och weest ghegroet, &c. Autheur der goedertierenheydt Iesus hope der saelicheydt Fonteyne der gratien en soeticheydt Des herten suyver wellusticheydt O weest ghegroet ô Iesus soet V stemme mijn siele smelten doet.

Vorige Volgende

Dit is een soete iubilatie van de Bruydt oft Christen ziele, naer dat sy haeren Bruydegom ontfanghen heeft.