De gheestelycke vryagie
(1624)–Anoniem Gheestelycke vryagie, De–
Auteursrechtvrij
[pagina 10]
| |
Hier soude de Bruydt oft Christen Ziele, wel willen Maria Finis Terrae, ofter Vinster Sterren, een krans ken van hare deuchden maken tot eene danckbaerheyt: maer sy kent haer seluen al te plomp daer toe.Ghelijck een Maghet die daer gaet
In eenen Lust-hof haer vermeyen
Die afghemaelt met bloemkens staet
In verwen en reuck verscheyen.
Al-om ist dat sy d'ooghe slaet
Oft haer misschien yedt souvv' ghereyen.
Sy siet hier Lelien wit en reyn
Daer rooskens toe, en daer half open:
Sy siet met violettekens kleyn
De beddekens aerdich bekropen:
Sy siet hier Thijm, daer Margelijn,
Daer Rosemarijn met douw bedropen.
Soo ist met my weerdighe Maeght,
Die ter Vinster Sterre hebt willen rusten:
Die v Lief alsoo hebt behaeght
Dat hy in v nam sijn wellusten:
Die daer in v dickmael heeft verdaeght
| |
[pagina 11]
| |
En oock ghenomen sijn nacht-ruste.
Bloemriekenden Hof nv ick bespie
V schoonheyt groot achter en voren:
Van bloemkens sulck ghetal ick sie
Dat ick daer in my sie verloren,
En oock om al te tellen die
Niemandt en isser oyt gheboren.
Nochtans wt al dees' bloemkens schoon
Soud' ick schoon Bruydt v gheerne vlechten
Een kransken, om ghelijck een kroon
Boven v weerdich hooft te rechten,
Oft om het self aen uwen throon
Ter uwer eeren te moghen hechten.
Maer hoe! wat soud' ick dit aengaen,
Ick die daer ben te plomp en te oneffen:
Noyt iemandt sulckx en heeft ghedaen,
'tSijn Engelen die ditte treffen:
Neen, liever will' ick my bestaen Alleen v lof hier te verheffen.
En singhen lof besloten Hof,
Lof klaer gheseghelde fonteyne:
Noyt onderroert van vuyl oft stof,
Die maer en spruyt vvt Godt alleyne:
Gheurighen balsem v sy lof
Die uwen gheur stort in't ghemeyne.
Lof sy v oock schoon Paradijs
Te schoon om d'ooghen te versaden
VVaer in de boomkens al om prijs
Met vruchten schoon staen overladen:
VVaer dat noch VVinters kouwd' oft ijs
Des bloem-hofs vrucht noyt en verspaeden.
| |
[pagina 12]
| |
Lof sy v spieghel onbeuleckt
Daer 's Hemels volck hun in aenschouvven:
Lof Dauids toren hooch vvtghestreckt:
Lof vveerdichste van alle Vrouvven:
Lof v tot vvien yeghelijck streckt
Sijnde in druck en in benouvven.
VVel aen dan Maria Finis Terrae:
VVel aen dan claren blinckenden dach
Nae dat uvven lof verbreydt is verre,
My doch beschermt voor den eeuvvigen nacht,
Op dat ick door uvve voorspraken
Oock in den Hemel mach gheraken.
|
|