Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. lvi.r]

[Hier naer volghen die dinghen ende triumphen die waren vp die marckt]

Hier naer volghen die dinghen ende triumphen die waren vp die marckt, gheduerende vp dese heleghe Crooninghe, ende met welcker ghereetscap het volck van Boulongien ontfinc den ghecroonden keysere, ende met wat begheerten, ende ooc ghenouchten dye si bedreuen.

TEr wijlen dat dese mysterien dye wi voren gheseyt hebben, ghedaen waren in die kercke, twee calommen van marbere waren vp die marct vpgherecht, dewelc was voor die kercke, vp die welcke inden eersten ghesedt waren eenen seer grooten Arent met twee hoofden, ende aen beyden sijden twee vergulden leeuwen, die welcke ghelijc twee fonteynen gauen ende wierpen wte ter wijlen datmen den dienst gods dede, ende alle den dach duere, ende ooc meesten deel den gheheelen nacht, seer ende wtnemende goede wijnen, te wetene, dye leeuwen witten wijn, ende den Arent rooden wijn. Ende hier bi so wasser eenen seer groten ende vetten osse ghebraden al gheheel den welcken osse was aen een seer groot ende sterc spit ghedaen, ende was ghelardeert ende ghefarseert van diueersche manieren van gheuoghelte ende ooc ghedierte, ende wiltbraet met vier voeten, ende dese voorseyde osse hadde die hoornen vanden hoofde vergult van sijnen goude, ende ooc die hoornen van sijnen voeten. Ende wt der veynsteren vanden pallaeyse waren gheworpen, broot coucxkens, roffelioenkens, ende witte brooden met grooten hoopen Ooc so wasser noch wt gheworpen wt den voorseyde veynsteren diueersche manieren van fruyte, als appelen, peeren, castanien, noten ende haesnoten, met confitueren van amandelen, coriandren, ende dier ghelijcke, die welcke dinghen vermaect ende solazeerde het volc ende den ionghers, dye die keyserlicke comste daer verbeydende waren. Ten anderen so waren daer een grote armee van volcke van diueerschen nacien also wel te peerde als te voet, ghelijc duytschen, spaengiaerden, ende andere, seer costelijc toegemaect ende verchiert, ende hadden bi hem een groot ghedeel velt gheschuts, ende wel twintich groote stucken dartillerie, waer mede si alle dye straten ende hoecken bewaerden, om datter gheene commocie, beroerte oft tweedracht onder tvolc commen en soude. Ende die capiteyn generael van dese armee ende gheselschape was mijn heere Anthonis de Leue, ghewapent van alle stucken, ende sadt so in eenen setele voor den pallaeyse vander stadt vp die voorseyde plaetse, ende alle die ander captieynen also wel spaengiaerden als duytschen saten rontsomme hem. Ende als nv den dienst gods voleyndt ende ghedaen was met alle dye ceremonien vander coronacien, so waren daer seer schone elegante ende ornate exhortacien ghedaen bi sommege gheleerde ende expeerte Oratuers, ter eeren, louinghe ende exaltacie der keyserlijcker maiesteyt. Ende binnen desen middele dat het volc wter kercken ghinc, ende dat hem elc te peerde settede, om der pompuesheyt der processien, het ghemeyn volck vander eender sijden ende van dandere, ende van allen sijden gheextimeert wel hondert duysent ende meer, commende wt der kercken met grooten ghedruyssche, begheerende ende grote affectie hebbende te siene hueren ghecroonden keysere, liepen in alle die straten ende hoecken daer hi voorby commen soude, clymmende vp die veynsteren, bancken, bordecxen, iae dat meer es, die goten ende die huysen waren al beseten ende ouerdect vanden volcke, ende alle die veynsteren ende gaten waren vol volcx, si braken gaten in dye mueren ende weeghen vanden huysen so groot was huerlieder begheerte dye sy hadden omme hueren ghecroonden Keysere daer te siene, daer en was gheen plaetse ledich, die huysen waren so verlast vanden volcke ende ooc die bordecxen, so datter sommege waren dye in vielen ende braken. Daer en was out ionc, groot noch cleyne, cruepel noch manc, man noch wijf, ten quammer al gheloopen daer si costen ende mochten om die keyserlijcke maiesteyt te siene, als naer eenen prinche godlijc van god vercoren ende ghesonden om der salicheyt ende bescherminge der weerelt amen.

Wat sal ic segghen vanden ornamenten van

[fol. lvi.v]

ter stadt, also wel die bedectelic ghedreghen waren als int openbaer, want dat wter maten ghinc. In wat weghe die Keyserlijcke maiesteyt commen moeste, dye straten waren schoon ghemaect ende verdect met groene ende bloemkens, die welcke bi diueersche ruecken, den menschen solazeerden, alle die weghen vanden huysen waren behanghen met tapijtse ghefigureert van goude ende sijde, aen den welcken tapijtsen ghehanghen waren meneghe costelicheyt van Iuweelen ende baghen van die rijckelicke vrouwen, dwelc seer sumptueus was om sien, want daer meneghe costelijcke rieme van goude ende siluere aen hinc, ten anderen so sachmen in meneghe plaetse tresooren van silueren staen voren aen die veynsteren ghemaeckt ende ghestelt trappewijs ghelijckmen dat ghecostumeert es te settene in dese heeren huysen, dwelc eenen schoonen luyster gaf, ende verblijde therte der menschen. Ooc die schone ioncfrouwen die al omme in die veynsteren laghen seer costelic verchiert met costelicke abijten waren lustich om sien, want daer menich schoon ende lustich vrauwen mensche in dye veynsteren lach. Maer noch waren daer triumphen ghedaen dye dese voorseyde in costelicheyt ende triumphen verre te bouen ghinghen. Te wetene, schone edificien vp der straten boghewijs ghemaect, schoone stellagien vp gherecht, ende die met seer costelicke tapijtsen behanghen vp die welcke seer schone personagien ghetoocht waren, ende wter maten schone triumphelicke spelen ghespeelt waren, van dye victorien dye die.Ke.Ma.ten diueerschen tijden ghehadt hadde. Aen alle die hoecke van der straten waren seer schoone latijnsche veersen ghemaect ende dye waren ghescreuen in fijnen goude letteren, declarerende dye louinge ende precatien der keyserlijcker maiesteyt. Noeyt en wasser ghesien solempneerdere, noch plaisantere, ende triumphelijcker, noch oock hooghelijckere, dan het spectacle van desen daghe.