Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

In wat ordonnancie men ghinck vanden Pallaeyse totter kercken van Sinte Peeternelle, daer dye Keyserlijcke maiesteyt, met seer groter solempniteyt ende eerweerdicheyt ghecroont was, vanden heleghen vader den Paeus metter Keyserlijcker croonen.

[fol. lij.v]

INden eersten so ghinghender in schoonder ordonnancie een groot gheselschap van edelen Paedgien, betooghende in hem grote schoonheyt. Daer naer volchden een groot ghetal van edelen lieden, grote heren ende rudders, seer rijckelic verchiert ende ghecleet. Daer naer quamender sommeghe heeren, Baenderheeren, Grauen, Marcgrauen, met een groot ghetal van Hertoghen ende Princhen, den welcken volchden sommeghe groote meesters ende Vassalen van des Keysers houe. Ende hem volchde veel massedraghers, Heraulten, Rois darmes, van diueerschen Coninghen ende princhen. Te weten van Vranckerijcke, Inghelant, Schotland, van Lusitanie, ofte van Poortegale, van Hongherien, van Polen, van Bemen, van Oostenrijck, van Sauoyen, ooc die Herauten ende coninghen van wapenen der keyserlijcker maiesteyt van diueersche Conincrijcken ende landen sijnder keyserlijcker maiesteyt toebehoorende, als Castilien, Arragon Nauarre, Napels, Sicilien, Granaten, Bourgoengien, ende van Oosten, alle ghecleet met huer wapenrocx, met noch andere posten ende herauten, weerdich om siene. Ende desen so volchden die hofmeesters der keyserlicker maiesteyt, met huere stocken twee ende twee te gadere. Die seer edele

[fol. liij.r]

heere, mijn heere van Roeulx, eerste Hoofmeestere quam alleene nae den anderen, seer rijckelijck ende costelijcken verchiert. met sijnen stocke houdende dien recht vp. Hier naer so volchde die keyserlicke maiesteyt ende die princhen die die ornamenten, groote verchiertheyt, ende teykenen droughen vander crooninghe, in deser oordonnanncien hier naer volghende. Ende eerst den doorluchtichsten prinche Bonifacius paleologus, Marcgraue van mont ferrat, aen hebbende eenen tabbaert van sijden cramosijne, ende daer bouen eenen mantele van cramosijnen fluweele, gheuoert met seer schoonen witten ermijnen ende het bonnet des Marcgraefschap gheboort ende verchiert met costelijcke ghesteenten, dwelck groot goet weert was, die welcke drouch in sijn rechter hant den keyserlicken sceptre, ghemaeckt van goude seer rijckelick ende wtnemende costelick Ende hem so volchde den seer edelen ende machteghen Prinche Fransoys Maria-de Roitera, Hertoghe van Durbin, oock verchiert in sijne seer rijckelijcke ende chierlijcke Hertoochsche cleedinghe, die welcke drouch in sijn rechter hant het Keyserlick sweert recht vp houdende, vanden welcken sweerde het cruys ende den appele metter scheyde waren ghewrocht bi wonderlijcke subtijle consten van ghesteenten, so dattet int ghesichte seer vreemt ende wonderlijck om sien was, om der costelicheyt wille, den welcken volchde in ordonnancie den doorluchtighen Prinche Philips conte palatin vanden rijne, ende Hertoge van Beyeren, oock verchiert seer costelijk metter cleedinghe ende hoede des Hertoochscaps, die welcke drouch in sijn handen die weerelt van fijnen goude. Hier na so volchde dye seer machtighe Hertoghe van Sauoyen Kaerle in sijne Hertoochsche cleederen, ghewrocht van sulcke costelijcken wercke, soe dat sijnen hoet gheestimeert was alleene weert te sijne hondert duysent ducaten, ende drouch in beyde sijn handen die keyserlijcke croone van sijnen goude, die welcke was seer rijckelick verchiert met soe meneghe costelijcheyt van ghesteenten ende peerlen, so datmen goeylicx die weerde niet gheextimeren en soude connen. Hier naer so volchde dye edele keyserlicke maiesteyt ghecleet metter conincklijcker albe, ende daer bouen eenen langhen seer costelijcken mantel van ghefriseerden goude vander weuinghe van Boulongien, hebbende sy sijn hooft die croone van Lombaerdyen, tusschen beyde die voorseyde eerweerdighe Cardinalen ghecleet met huere pontificaelsche cleederen. Ende die doorluchtighe ende seer edele graue van Nassauwe, vpper Camerlinc van der keyserlicker maiesteyt hielt den steert vanden voorseyden mantele. Ende alder naest hem so volchden der vier eerweerdighe Bisschoppen, ende die Oratuers ende Ambassaden vanden coninck van Vranckerijcke, van Inghelant, Schotlant, van Poortegale, van Hongherien, van Bemen van Polen, vanden edelen hertoghe van Ferrare, ende van andere grote princhen ende ghemeynte, vander seer machteger heerlicheyt van Venegien, van Sennes, van Luycke, van Florencen, ende andere heerlicheden, dye welcke alle mannen waren van seer grooter weerdicheyt ende grauiteyt. Hier naer volchden die Senatuers vanden rade der keyserlijcker maiesteyt, dye Secretarissen, ende financiers, ende sulcke personagien seer costelicken ghecleet met langhe cleederen elck naer sijnen state ende qualiteyte. Ende om die laetste naer dese langhe ende groote ordonnancie soe volchdender noch sommeghe Artchiers seer chierlijck ende rijckelick ghecleet met rocx ghemaect van orpheuerie, dye welcke besloten die pompuesheyt ende hoocheyt vander voorseyder costelijcker ende triumphelijcker processie.