Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe triumphelijck ende met hoe groten staet, die Keyser Karolus te Boulongien binnen quam.

¶ Dat.xv.Capittel.

[fol. xlviij.r]

INt Iaer.M.CCCCC.xxix.in Nouembre, es die keyserlike maiesteyt voort ghereyst met groten state nae die stadt van Boulongien, daer doen ter tijt die Paeus van Romen Clemens dye.vij.ste van dien name sijnen Paeuselijcken stoel hadde. Ende als hi der stadt ghenaecte, so quamen.xxv.cardinalen die van haren muylen af saten ende ghinghen hem teghen ende hebben hem ende alle sijn maiesteyt ontfanghen met groter reuerencien, ende sijn doe weder vp haer muylen gheseten, ende der sijden vanden Keyser ghinc dye Cardinael Danconne ende die cardinael Vernese. Ooc sijnder.Ke.M.teghen ghecommen.iiij^c.mannen van wapenen. Ende vp den vierden dach Nouembris quam hi doen in die stadt voorseyde. Ende ten eersten quamen in.iij^c.lichte peerden volcx wel ghewapent al van eender leuereyen van laken. Daer nae.x.grote stucken gheschuts of artelryen. Daer nae.C.voetknechten Pioniers, ende elc hadde in sijn hant een tacxken van een laurenboom. Doe dye capiteyn van orloghen wel vp gheseten, daer naer quam dat middelbaer gheschut ende artelrye. Doe quam Anthonis de Lyeua dye ghedraghen wert vp een stagie gemaect van caneyt fluweel. Doe quamen.xiiij.vaenkens duytsche knechten wel toe ghemaect. Doen twee grote heeren vp ghebardeerde peerden in haer vol harnasch vanden hoofden totten voeten, ende voor elcken werden ghedraghen bannieren van gouden laken met eenen swarten Arent, ende noch een banniere van wit damast met een root cruys daer in, welc die paeus den keyser hadde ghegheuen. Daer naer mijn heere van Reulx met.iij^c.mannen van wapenen wel toe ghemaect, met rocken van sijden ende fluweele, blaeu, gheel ende root. Daer naer die grote heeren ende meesters wt Spaengien met ghebaerdeerde peerden wel vp gheseten ende gheaccoustreert met gulden laken, met iiij^c.mannen van wapenen. Doe quamen van skeysers paeygien.xxv.ghecleet in gheel fluweel, sittende vp genetten ghebaerdeert met gouden laken ende ander triumphelicheyt. Daer naer ander groote heeren wt Spaengien wel ghewapent, ghecleet met gouden laken met ghebardeerde peerden. Daer nae.vi.hondert hallebaerdiers ghecleet int gheele. Daer nae die Keyserlijcke maiesteyt sittende vp een honghers peert seer costelic ghebaerdeert, die steghelreepen ende dat ghebeet was van fijnen goude, sittende onder eenen hemel van gouden laken, ende hy was seer edelijck ghewapent int harnasch, daer bouen eenen costelijcken rock van gouden lakene, ende voor hem sijn Maerschalck draghende een bloot sweert. Ende aen die sijden ghinghen te voete.xxv.edel mannen van Bononien, ghecleet met wit satijn doorsneden, gheuoeyert met gulden laken, met coussen van root fluweel, ende wambeysen van root carmesijn. Doen quam mijn heere van Nassauwen int volle harnasch, met eenen rock daer ouer van gouden lakene, ende sijn peert ghebaerdeert met gouden laken, ende met hem veel ander edele mannen ende grote heren wel ghewapent, ende noch.lxxx.mannen van wapenen ghecleet daer ouer met swarte fluweelen rocken. Daer naer noch vele ander met diueersche leuereyen tot wel int ghetale van twee duysent. Daer na quamen noch.vi.vaenkens Spaengiaerden te voete, meest deel al busseschieters ghecleet int gheele.

¶ Als die Keyserlicke maiesteyt binnen der stadt was so brachtmen voor hem dat cruyce, dwelck hi custe, ende terstont daer naer wert daer ghelt gheworpen, so in gout ende so in siluere ontrent.iij.duysent ducaten. Doe liet hem die Paeus draghen buyten den pallaeyse tot vp die trappen vander kercke van sinte Petronius, daer hi sadt in sijnen stoel, ende bi hem sijn Cardinalen. Als die Ke.M.quam aen die voorseyde trappen, so es hy af ghestaen vanden peerde met mijn heere van Nassouwe ende sijn ander heren, ende es so met sijnen gouden hemel oft ouerdecsele bouen ghebracht daer die Paeus sadt, die sijnder keyserlicker maiesteyt tot drie reysen reuerencie dede. Doe quam die Keyser byden Paeus ende viel vp sijn knien ende custe sijn voeten, daer naer vpstaende custen hy sijn handen ende aensicht, daer nae quamen alle die heeren ende custen des Paeus voeten. Doe stont die paeus vp ende custe die Keyserlike maiesteyt aen sijn wanghe tot drye reysen toe, segghende. Ick bidde v om ghenade ende

[fol. xlviij.v]

sette mi in u, ende dat ghi mijn voeten ghecust hebt en es mijnen wille niet, maer om der cerimonien wille, diemen ghewoonlick es te onderhouden, als een Keyser sijn croone ontfanct. Daer nae hebben si malcanderen inden arm ghenomen malcanderen minlijc groetende, ende die paeus nam den Keyser byder hant ende leyde hem tot vp dye trappen, ende doe liet hem die Paeus weder draghen in sijn pallaeys. Daer nae wert die.Ke.M.ooc gheleyt ten pallaeyse met groter triumphe met grote menichte van claroenen ende trompetten. Ende al dat volc volchde al na rijck ende arm roepende Viue Lempereur te water ende te lande, ende al dat volc weenden meest al van vruechden. Ende commende voor den Paeus presenteerde hy hem een bursse van gouden laken daer gouden penningen in waren met gheconterfeyte aensichten na dat leuen vanden voor leden keyseren ende Coninghen, ende van sijn eygen aensicht, ende van sijns broeders aensicht die.coninc.van Vngeryen, ende veel andere welcke penninghen weert waren in goude.v^m.ducaten Ende als die K.M.ghecommen was so schoot men los alle die grote bussen ende mortieren, ende.ij^m.haechbussen. Ende dye.Ke.M.was int pallaeys ghelogeert. Des anderen daghes spraken die keyser ende die paeus langhen tijt te samen alleen, daer nyemant af en weet wat die materie was.